Канада ќе одобри укинување на санкциите за враќање на поправените руски турбини во Германија, на која и се потребни за одржување на работата на гасоводот Северен тек 1, најави канадскиот министер за природни ресурси.
Канадската влада, која издава дозвола за изземање на враќањето на турбините од нејзините санкции кон Русија, рече дека овој потег ќе ја поддржи „способноста на Европа да пристапи до сигурна и достапна енергија додека тие продолжуваат да се оддалечуваат од руската нафта и гас“.
Канада, исто така, најави дека ќе ги прошири санкциите против енергетскиот сектор на Русија за да го вклучи и индустриското производство. Но, канадскта Влада оценува дека „во отсуство на неопходното снабдување со природен гас, германската економија ќе претрпи значителни тешкотии, а самите Германци ќе бидат изложени на ризик да не можат да ги загреат своите домови како што се приближува зимата“.
Германската влада потврди дека добила позитивен сигнал од Канада во врска со турбините потребни за одржување на Северен тек 1. Турбините прво ќе бидат испратени во Германија, која потоа ќе ги достави до рускиот државен Гаспром, изјави владин извор, пренесува Ројтерс.
Руски Гаспром го намали капацитетот долж гасоводот Северен тек 1 на само 40 отсто од нормалното ниво минатиот месец, повикувајќи се на одложеното враќање на опремата што ја сервисира германската компанија Сименс енерџи во Канада. Кремљ во петокот соопшти дека ќе ги зголеми испораките на гас во Европа доколку турбината биде вратена.
Украина се спротивстави на предавањето на турбините на Гаспром и Киев верува дека таквиот потег ќе ги заобиколи санкциите против Русија, изјави во четвртокот извор од украинското Министерство за енергетика.
