Нови воздушни напади извршија израелските сили вврз Газа, а палестинските милитанти возвратија денеска со ракетни напади кон Израел, без знаци за крај на најтешката ескалација во последните неколку години.

Американски и арапски дипломати се обидуваа да ја смират ситуацијата по ноќно насилство во кое милитантите испукаа околу 200 ракети кон градови во Израел, чии авиони погодија, како што наведе израелската армија – цели што ги користел Хамас, исламистичката група што управува со Газа.

Најмалку 136 лица се убиени во Газа од почетокот на непријателствата во понеделникот, од кои 34 деца и 21 жена, со уште 950 ранети, соопштија палестинските медицински лица.

Израел пријави осум мртви, меѓу кои и еден војник на границата со Газа и шест цивили, од кои две деца.

Израелското бомбардирање уби најмалку 12 Палестинци во текот на ноќта, соопштија медицинските лица денеска, вклучително и една жена и нејзините четири деца кои загинаа кога беше погодена нивната куќа во бегалски камп. Уште три лица загинаа, а многу други беа ранети, нагласија медицинските лица.

Илјадници Израелци бараа засолниште додека сирените се огласија ноќеска. Една ракета лансирана од Газа погоди станбена зграда во јужниот израелски град Бер Шеба, соопшти полицијата. Медиумите соопштија дека некои луѓе биле повредени во градот.

Хамас го започна својот ракетен напад во понеделникот по тензиите во врска со спор за иселување палестински семејства во Источен Ерусалим и како одмазда за судирите на израелската полиција со Палестинците во близина на џамијата ал-Акса, третото најсвето место во исламот.

Регионалните и меѓународните дипломатски напори допрва треба да покажат знаци на запирање на непријателствата.

Претставникот на американскиот претседател Џо Бајден, Хади Амр, заменик помошник секретар за Израел и палестински прашања, замина вчера, пред состанокот на Советот за безбедност на ОН што се очлекува утре. Американската амбасада во Израел соопшти дека тој има за цел „да ја зајакне потребата да се работи кон одржлив мир“.

Палестинските жртви се проширија и надвор од Газа. Палестинците, кои секоја година на 15 мај го одбележуваат своето раселување во војната во 1948 година што го опкружуваше создавањето на Израел, пријавија 11 убиени на окупираниот Западен брег, откако се судрија демонстрантите и израелските сили.

Низ централниот и јужниот дел на Израел, од градовите што се граничат со Газа до Бершеба и Тел Авив, луѓето ги прилагодија своите животи, трчајќи кон засолништа кога ќе слушнат сирени, радио и ТВ предупредувања или црвени пораки за тревога на мобилните телефони.

Непријателствата меѓу Израел и Газа се придружени со насилство во израелските мешани заедници на Евреи и Арапи. Синагоги биле нападнати, арапски продавници биле вандализирани и започнале улични тепачки, што го натера израелскиот претседател да предупреди на граѓанска војна.

Египет, кој ги води регионалните напори за воспоставување смиреност, се залага за прекин на огнот во текот на ноќта е во очекување на разговорите, соопштија два египетски безбедносни извори. Египет, кој ја дели границата со Газа, се потпираше на Хамас и ги притискаше другите, како што се САД да обезбедат договор со Израел.

Египетските и јорданските министри за надворешни работи разговараа за напорите да се стави крај на конфронтацијата во Газа и да се спречат „провокациите“ во Ерусалим, соопшти египетското Министерство за надворешни работи.

„Разговорите зазедоа вистински и сериозен пат во петокот“, рече палестински официјален претставник. „Медијаторите од Египет, Катар и Обединетите нации ги засилуваат своите контакти со сите страни во обид да се воспостави смиреноста, но договор уште не е постигнат.

Обединетите Арапски Емирати вчера повикаа на прекин на огнот и разговори, изразувајќи им сочувство на сите жртви. Во септември, ОАЕ и Бахреин станаа првите арапски држави во четвртина век што воспоставија формални врски со Израел.

Израел вчера соопшти дека повеќе од 2.000 ракети биле истрелани од Газа кон Израел од понеделникот, со половина пресретнати од ракетна одбрана и 350 паднати во појасот Газа.

Граѓанските немири меѓу Евреите и Арапите во Израел им зададоа силен удар на израелските опозициски напори да го симнат премиерот Бенјамин Нетанјаху по серијата неубедливи избори, зголемувајќи ја можноста за петто гласање за нешто повеќе од две години.