Премиерот Димитар Ковачевски, во интервју за австрискиот дневен весник „Ди Пресе“, порача дека во време на воената агресија на Русија кон Украина, членството во НАТО е од огромно значење за РС Македонија, особено за нејзината економија.

-Неиспровоцираниот напад на Русија врз Украина докажува дека членството во најголемиот светски одбранбен сојуз НАТО, е од огромно значење за секоја членка. Ние сме мала земја. Нашата безбедност ја гарантираат сите членки на НАТО, што има многу позитивни последици за нашето општество – исто така и за нашата економија. Затоа што странските инвеститори, особено оние од инфраструктурниот сектор, знаат дека се во безбедна земја, заштитена од НАТО, истакнува премиерот Ковачевски во интервјуто за “Ди Пресе“.

Ковачевски, како што информираат од владината прес-служба, за австрискиот весник се осврнува и на континуираниот геостратешки интерес на Русија за Балканот.

-Западен Балкан отсекогаш бил од интерес за Русија. Нејзиното влијание преку медиумите, вклучително и преку некои политички партии, беше секогаш присутно. Русија има интерес од замрзнати конфликти на Балканот, кои им оневозможуваат на земјите да го изодат својот пат кон евроатлантските интеграции, дополнува претседателот на Владата за австрискиот медиум.

Владата на својата веб страница го објави интервјуто на Ковачевски, кое го пренесуваме онака како што е објавено:

На скала од еден до десет, колку сте среќни што Северна Македонија е во НАТО?

Неиспровоцираниот напад на Русија врз Украина докажува дека членството во НАТО, најголемиот светски одбранбен сојуз, е од огромно значење за секоја членка. Ние сме мала земја. Нашата безбедност ја гарантираат сите членки на НАТО. Ова има многу позитивни последици за нашето општество – исто така и за нашата економија. Затоа што странските инвеститори, особено оние од инфраструктурниот сектор, знаат дека се во безбедна земја, заштитена од НАТО. Значи, на скала од еден до десет, тоа е чиста десетка.

Пред неодамнешниот самит на ЕУ, естонската премиерка Каја Калас рече: „Апетитот на Путин расте со јадењето.“ Дали сте загрижени дека Северна Македонија наскоро ќе се најде на менито на Кремљ?

Западен Балкан отсекогаш бил од интерес за Русија. Неговото влијание преку медиумите, вклучително и политичките партии, беше секогаш присутно. Таа има интерес од замрзнати конфликти на Балканот, кои им оневозможуваат на земјите да го изодат својот пат кон евроатланските интеграции. И во Северна Македонија ги имаме овие проблеми.

Од каде потекнуваат дезинформациите во Северна Македонија?

Од трети земји кои не сакаат оваа земја да напредува и да се развива. Ова е јасно финансирано од Русија. Затоа членството во ЕУ е наша стратешка цел. Тоа нуди слобода на критичко размислување, социјална правда и економски просперитет. Тоа го сакаат луѓето во Северна Македонија – и во регионот.

Дали ги забранивте и пропагандните медиуми РТ и Спутник, како што неодамна направија ЕУ, САД, Велика Британија и другите?

Да. Овие одлуки на Советот ги спроведевме во целост. Северна Македонија целосно ја усогласи својата надворешна политика со ЕУ. За прв пат воведовме санкции кон Русија, почнувајќи со оние од 2014 година. Пред овој конфликт, сè уште не бевме целосно координирани.

Северна Македонија сака да влезе во ЕУ, но ви оди како на Сизиф: Го сменивте Уставот, името на вашата земја – но секој пат каменот ќе се спушти малку пред целта, и има ново вето против почетокот на пристапните преговори. Каде се наоѓате сега?

Северна Македонија е мултиетничко општество. Тоа е запишано и во нашиот устав. За да може да функционира, мора да постојат заеднички цели – како што е пристапувањето во ЕУ. ЕУ дава демократија, слобода на мислата, правда, благосостојба. Нашата земја го има најтешкиот пат до првата меѓувладина конференција со ЕУ. Веруваме дека ова може да се случи во блиска иднина. Но, тоа не зависи само од нас. Се работи за повлекување на ветото воведено од поранешната бугарска влада.

Како Ви одат односите со новата влада во Софија?

Пред смената на власта односите беа многу лоши. Од првиот ден се согласивме со новиот бугарски премиер Кирил Петков, отворените политички проблеми да се решаваат врз основа на европските вредности, меѓусебното почитување и достоинството на граѓаните на двете земји. По два месеци гледаме дека комуникацијата станува попозитивна. Не знам кога можеме да објавиме договор. Сепак, почетокот на пристапните преговори би бил позитивен пример за другите земји во регионот, дека земја која претрпе промени, која имаше конфликти во општеството, ја има оваа можност. Убеден сум дека би можеле брзо да се интегрираме: Не заборавајте, 17 години сме кандидат за членство во ЕУ.

Дали војната во Украина Ви помага кај вашите цели за ЕУ или ги отежнува?

За мене, почетокот на пристапните преговори е и геостратешко безбедносно прашање. Затоа што тоа ќе ја промени реториката во земјата и драматично ќе го намали влијанието на третите држави во земјата, популистичките гранични групи и партии кои очигледно се финансирани од Русија.

Како тоа?

Затоа што тогаш прашањето повеќе не би било: Кога ќе ги започнеме преговорите, туку: Што точно ќе правиме во секое поглавје?

Унгарија му даде азил на Вашиот претходник Никола Груевски, кој е правосилно осуден на затворска казна. Дали побаравте екстрадиција од Унгарија?

Нашиот судски систем е ослободен од политичко влијание. Поранешниот премиер Груевски е осуден, а против него се водат и други постапки. Прашањето за политичкиот азил во Унгарија им се упатува на унгарските политичари, не на мене. Еден ден тој ќе мора да се врати и да се соочи со својата казна.