Пред точно две години остваривме една од нашите стратешки цели поставени уште од осамостојувањето на државата – полноправно членство во НАТО, напиша денеска премиерот Димитар Ковачевски на својот фејсбук профил.
Според Ковачевски, да се биде дел од НАТО значи исполнување на сите цивилизациски стандарди.
– Две години подоцна, во екот на најголемата воена и економска криза по Втората светска војна, ја согледуваме исправноста на оваа одлука. Во овие неизвесни времиња, кога целиот свет се грижи иднината и безбедноста, С. Македонија е дел од најмоќниот воено политички сојуз кој го гарантира нашиот територијателен интегритет и сигурност, објави Ковачевски.
Членството во Алијансата, како што наведува, е многу повеќе од гарантирана безбедност и заштита на нашите граѓани.
-Да се биде дел од НАТО значи исполнување на сите стандарди на цивилизираниот свет како заштита на човековите права, солидарност меѓу народите и унапредување на демократијата. Како членка на НАТО ќе продолжиме активно да учествуваме во сите активности на Алијансата и да го градиме сојузништвото со нашите партнери. Оваа определба значи долгорочен развој за нашата земја и сигурна иднина за нашите деца, наведува Ковачевски.
Денес, додава премиерот, се потсетуваме дека одлуките кои владата на СДСМ ги донесе беа, како што напиша, визионерски и во најдобар интерес на граѓаните.
-Со храбри и одлучни чекори продолжуваме понатаму зашто политката е лидерство и одговорност за иднината на сопствените граѓани, пишува Ковачевски.
По повод две години членство во НАТО денеска фејбсук објави напишаа и министерката за одбрана Славјанка Петровска и министерот за надворешни работи Бујар Османи.
