Откако работната група за уставни измени ќе ги состави амандманите, наследниците на Гоце Делчев ќе ги вметнат сонародниците и наследниците на Радев во македонскиот Устав, му порача премиерот Димитар Ковачевски на неговиот бугарски колега Румен Радев кој изјави дека „Владата на РС Македонија може да каже дека гради модерно мултиетничко општество кога ќе ги впише сонародниците на Гоце Делчев во својот Устав“.
Ковачевски успеа со јазични конструкции да „каже се“ и да не спомне Македонци, а да прочита јавноста дека „му опонира“ на гугарскиот претседател. Амандманите кон Уставот, нагласи Ковачевски, се дел од Преговарачката рамка со ЕУ.
-Ние преговараме со ЕУ, а не со Бугарија, и затоа сметам дека тоа е нешто што ќе тече како процес и е нешто што треба да се случи со оглед на тоа што граѓаните заслужуваат да живеат во држава членка на ЕУ, рече Ковачевски.
Потсети дека веќе се води дискусија во рамки на работната група за подготвување на уставните амандмани.
– За жал, во ниту еден важен процес не учествуваат претставници од опозицијата. Јас лично сметам дека имаме приоритет овој пат да ги исполниме обврските што произлегуваат од Преговарачката рамка, а која е прифатена од страна на Собранието со заклучоците за коишто гласаше и Алијанса за Албанците, меѓутоа да видиме како ќе се одвива дискусијата. Сепак сметам дека треба да се држиме до она што е приоритетно, а тоа е отворање на поглавјата и продолжување на патот на државата кон полноправно зачленување во ЕУ до 2030 година, рече Ковачевски.
Бугарскиот претседател за БГНЕС рече дека раководството на Македонија треба да ги убеди своите граѓани, а не Бугарија, дека гради демократска држава.
– Владата на РС Македонија може да каже дека гради модерно мултиетничко општество кога ќе најде сили да ги впише сонародниците на Гоце Делчев во својот Устав, рече Радев.
