Селекторот на македонската машка ракометна репрезентација, Кирил Лазаров, ја коментира ждрепката за Светското првенство (СП) кое ќе се игра во 2023 година, а на која нашиот национален тим ги доби Норвешка, Холандија и Аргентина.
„Многу интересна и тешка група за нас. Не можам да бидам објективен, затоа што нашата репрезентација за прв пат ќе настапи без ракометари од калибарот на Миркуловски, Стоилов, Лазаров.. Ме загрижува и неиграњето на Вардар во Лигата на шампионите, затоа што некои од нашите репрезентативци остануваат без потребните силни натпревари во текот на сезоната и пред почетокот на Светското првенство. Не ни останува ништо, освен да почнеме да го оформуваме ликот на новата репрезентција на Македонија. Длабоко во себе верувам во невозможни мисии и работа и само така можеме да одиме напред. За Норвешка не треба да трошиме зборови, Холандија беше хит на последното Европско првенство. Аргентина со години знаела да прави големи проблеми и на посилни репрезентации од нашата. Ќе се фокусираме на себе и нашата селекција и ќе работиме на тоа што подобро да се подготвиме за настапот на Мундијалот“, изјави Лазаров.
Македонија го отвора СП 2023 против репрезентацијата на Норвешка. Мечот е закажан на 13 јануари. Сите дуели на „црвено-жолтите“ на овој Мундијал ќе се играат од 20:30 часот.
