Луиџи Ди Мајо, еден од клучните луѓе во новата италијанска Влада е во поход на медиумите кои ги обвинува дека „ја загадуваат расправата“ и упатува закани дека државните фирми ќе престанат да огласуваат во нив, пишува Н1.

– Весниците секојдневно ја загадуваат јавната расправа, а најлошо е тоа што го прават со јавни пари, објави на Фејсбук лидерот на движењето Пет ѕвезди (М5С). Тој предупреди дека Владата во следниот буџет планира „намалување на недиректните државни придонеси“ во медиумите.

– Подготвуваме писмо на државните фирми од кои ќе бараме да престанат да им плаќаат на весниците за купување простор за огласување, нагласи Ди Мајо, кој е потпретседател на Владата и министер за економски развој.

Исто како и основачот на М5С, тој е уверен дека медиумите се обидуваат да ја поткопаат владејачката коалиција во која е и Лигата, чиј шеф Матео Салвини е министер за внатрешни работи.

Ди Мајо и неговата партија, премиерот Џузепе Конте и неколку министри од редовите на Лигата, кои во најголем број комуницираат пред Твитер и Фејсбук, покренаа низа напади врз традиционалниот печат во име на „одбрана на народот од естаблишментот“.

– Тоа не е новинарство. Тоа е само пропаганда со цел да се бранат интереси на мала елита што мисли дека може да задржи контрола и кога врне и кога грее сонце, напиша 32-годишниот Ди Мајо.

– Не ги читам италијанските весници за да се информирам, туку за да разберам како сакаат да не нападнат, додава тој.

Рафаеле Лорусо, претседател на италијанското новинарско здружение ФНСИ вели дека Ди Мајо „не е навикнат на притисок на медиуми или на идејата за слободен печат“.

Салвини и Ди Мајо се големи корисници на социјални мрежи и постојано објавуваат видео снимки на Фејсбук и пораки на Твитер.

– Преферираат социјални мрежи бидејќи на тој начин може директно да им се обраќаат на своите поддржувачи и да зборуваат што сакаат, објаснува Лорусо.

Салвини неодамна откри дека една од неговите видео снимки на Фејсбук ја погледнале повеќе од осум милиони луѓе и тоа според него „е многу повеќе отколку што би добил во традиционалните медиуми“.

Овој последен напад на лидер на партија што се залага за демократија и често ги осудува медиумите за лажни вести, предизвика тревога во Италија и поради тоа реагираше и претседателот Серџо Матарела.

– Безусловна слобода за медиумите е темел и клуч на демократијата, нагласи Матарела.

Новинарскиот ветеран Ецио Мауро во коментар во „Ла Република“ напиша дека изјавите на Ди Мајо го откриваат всушност неговиот страв.

– Во неговиот свет весниците се непријатели, слепи патници, паразити, смета Мауро и додава дека заканите на министерот покажуваат „страв од слободно, независно, плуралистичко и автономно јавно мислење“.