Вицепремиерот и министер за животна средина Изет Меџити, во пресрет на изминувањето на 100 дена од новата Влада, оценува дека односите меѓу коалициските партнери се коректни и дека нормално е да има различни размислувања, но дека Владата има демократски и политички капацитет да го реши тоа.

– Би ги оценил како коректни. На почеток сме на поставување на работите и нормално е некаде да има различно размислување, но уште еднаш ќе потенцирам дека Владата има демократски и политички капацитет тоа да го реши со самиот факт што од деведесетите до сега, е Влада со најголем број пратеници на мнозинството 78 и со многу други пратеници кои со една нога се веќе дел од мнозинството, изјави Меџити, кој деновиве има активности во рамки на Неделата на ОН во Њујорк.

Вицепремиерот, како што пренесува известувачот на МИА од Њујорк, смета дека тие се придржуваат на тоа што го кажале во текот на кампањата против бизнисот со казината.

– Веќе имаше укинување на еден спорен договор на Лотарија на Македонија.

Во вторник се очекува да се донесат две одлуки – една за укинување на сите лиценци за онлајн казина и третата точка ќе биде некомпромисна борба против организирање на казино бизнисот на црно, кој што не е проблем само за нашите граѓани туку и во регионот.Ѓ

Второ, интензивна е борбата против корупцијата, бескомпромисна, незаборавајќи на постулатите дека не треба да биде реваншизам, не треба да биде моноетничка, туку треба да биде праведна и сите оние кои се огрешиле да одговараат пред законот, рече Меџити во изјава за медиумите во Њујорк.

Имаше, вели тој, во овие 100 дена одлуки со кои покажале и докажале дека за „Влен“ најважната инвестиција е човечкиот фактор, посочувајќи притоа на одлуката што беше донесена на владина седница за универзитетскиот кампус „Мајка Тереза“ од 35 милиони евра.

Заложбите на оваа Влада, вели Меџити, е зајакнување и на децентрализацијата која, како што вели, е столб и на Охридскиот договор и европска вредност.

– Оваа Влада почна со ветувањата, ќе додели сресдтва на општините без разлика на нивната политичка припадност или боја, врз основа на метологија по број на жители на сите општини и врз основа на идеи и проекти што веќе ги имаат доставено.

Оваа година ќе бидат 100 милиони евра, а во наредните по 250 милиони евра. Во еден мандат околу милијарда евра.

Не застануваме тука, туку во рамки на ЗЕЛС веќе се преговара за нова фаза на фискална децентрализација што е системско решение за зајакнување на децентрализацијата оти во краен случај општинската власт е најблику до граѓаните и најлесно може да ги реши нивните проблеми, рече Меџити.

Во рамки на посетата на Њујорк, вицепремиерот Меџити заедно со претседателката Гордана Сиљановска Давкова, која ја предводи државната делегација на Генералното собрание на ОН, и министерот за надворешни работи и надворешна трговија Тимчо Муцунски, беа во посета на Граѓанскиот центар Дибра, во рамки на кој функционира џамија, во Фригхолд, Њу Џерси во која се собираат иселеници по потекло од дебарско.

Претходно, Меџити и Сиљановска Давкова беа и во црквата „Свети Никола“ во Тотова, исто така во Њу Џерси, на литургија и на средба со дијаспората.

Меџити вели дека ваквиот начин на комуникација со дијаспората укажува на нов пристап и јасна порака за нова интерпретација на работите.

– Разговаравме и за проблемите со кои се соочуваат на граничните премини и  за други проблеми што сакаме да им ги олесниме и да ги решиме, но дадовме и јасна порака дека ова е нов почеток, нова влада и нова интерпретација на работите.

Затоа, заедно со претседателот на државата и со министерот за надворешни работи ја посетивме црквата „Свети Никола“ па потоа заедно бевме и во Исламскиот културен центар каде не пречекаа дебарчани.

Ова беше добра порака и до нив и до граѓаните дека ова е нов почеток и почитување на различните вредности, рече вицепремиерот Меџити.

Извор: МИА