Германскиот канцелар Фридрих Мерц изјави дека му кажал на американскиот претседател, Доналд Трамп, зошто мисли дека војната во Иран е погрешна, но, истовремено, се обидува да одржува добри односи со него и дека досега успеал во тоа.
Мерц ова го кажа за германски „Шпигел“ кога беше прашан зошто појасно не му се спротивстави на американскиот претседател и додаде дека за време на неговата последна посета на САД не разговарал јавно со него за своите ставови за Шпанија, НАТО алијансата и други прашања.
„Не започнувам дискусија за Шпанија или Велика Британија пред новинарите во Овалната соба. Му кажав на претседателот зад затворени врати дека двете земји се сигурни партнери на НАТО кои не треба да ги изгубиме. Од самиот почеток самиот си велам дека нема смисла да се води спорна дискусија во таква атмосфера. Ги гледав оние што го правеа тоа и не помина добро“, рече Мерц, алудирајќи на украинскиот претседател Володимир Зеленски.
Како што објасни, тој се прилагодува на своите соговорници.
Мерц го цитираше Светиот римски император Фредерик II, кој рекол дека „дипломатијата без оружје е како музика без инструменти“ и рече дека од тоа извел заклучок дека „сака да може да се брани за да не мора да се брани“.
„Европската дипломатска моќ ќе биде навистина ефикасна само ако ја поддржиме со воени капацитети. Затоа им се обраќам на Французите и велам: Ајде да разговараме за тоа како можеме да ја заштитиме Европа“, рече Мерц, додавајќи дека со ова мисли на сè што е потребно за безбедна Европа.
Фото: архива
