Претседателот на ВМРО-ДПМНЕ Христијан Мицкоски, од Гази Баба денеска ја почна акцијата „Македонија за сите луѓе“, порачувајќи пред присутните дека ќе донесат поевтина струја и политики во корист на сите луѓе.

– Денеска ќе зборуваме како до гасификација на домаќинствата, како до најмалку 50 проценти гасифицирани домаќинства во нашата Македонија, со бесплатен приклучок за гас, без дополнителни трошоци, ќе зборуваме како до поевтина струја преку произведување на електрична енергија, а тоа ќе го постигнеме со продолжување на работниот век и модернизирање на производните погони, тоа се рударско енергетскиот комбинат во Битола и рударско енергетскиот комбинат во Кичево, рече Мицкоски во изјава за медиуми.

Тој воедно додаде дека тие имаат сосема спротивна политика од Владата на СДСМ.

– Ние зборуваме како да го модернизираме и да го продолжиме работниот век на термоцентралата Битола, и термоцентралата Осломеј најмалку до 2040 година. Ќе зборуваме за подобрување на животната средина, на екологијата, најмалку 50тина проценти поквалитетен воздух за граѓаните споредено со оваа ситуација која што е денеска. Ќе зборуваме за темите кои што навистина живот значат за граѓаните и кои што ќе бидат значајни во периодот кој што следи а тоа се овие локални избори, изјави Мицкоски.

-Ние во концептот Македонија за сите луѓе ќе понудиме решенија, имаме јасна методологија како да го зголемиме производството на струја кое сега е некаде на 60% од тоа што беше во 2017 година, нашата методологија е модернизација и инвестирање во еколошки филтри и десулфуризација во двете најголеми производни постојки тоа е РЕК Битола и РЕК Осломеј и продолжување на нивниот животен век до 2040 година, нешто кое е спротивно на она кое го ветува СДСМ и Зоран Заев, впрочем колку повеќе ќе се произведува, толку електричната енергија ќе биде пониска, и на тој начин со таа методологија, модернизација и инвестирање во еколошки филтри, успешно ќе се справиме со предизвиците и ќе добиеме поевтина електрична енергија за домаќинствата, истакна Мицкоски вечерва.

Мицкоски посочи дека првата политика која е дел од концептот Македонија за сите луѓе е поевтина електрична енергија која ќе се обезбеди со новата методологија, како и сериозни инвестициски циклуси и поевтина електрична енергија за сите домаќинства.

-Најголем процент на загадување на амбиенталниот воздух доаѓа од системот на затоплување на нашите домови, со промена на системот односно со користење на гасот кој ќе биде овозможен од идната општинска и градска власт секое домаќинство ќе добие можност да избере бесплатен приклучок на гас коешто идното општинско или градско претпријатие ќе го изведе до секое домаќинство, планот е во еден четири годишен мандат најмалку 50% проценти од домаќинствата да добијат бесплатен приклучок на гас, а со тоа да се промени системот на затоплување на домаќинствата, а со тоа да имаме почист воздух, а со тоа да имаме и поздрави сограѓани, потенцираше Мицкоски.

Мицкоски вели дека власта планира повторно зголемување на цената на горивата со наметнување на таканаречен „воен данок“, затоа што Буџетот е празен, а сакаат да трошат и да крадат, па потенцираше дека ВМРО-ДПМНЕ и коалицијата тоа нема да го дозволи во Собранието, па граѓаните да плаќаат поскапи горива заради грабежот кој власта го прави, туку парите ќе ги врати назад кај граѓаните и ќе вложува по 10 милиони евра годишно во образованието, во културата, во спортот, вкупно 40 милиони евра во четири годишен мандат за нови проекти.

-Политиките од нашиот концепт предвидуваат она зголемување од акцизата за три денари плус данок на додадена вредност за дизел горивото, и парите кои сега непродуктивно се трошат, да се вратат назад кај граѓаните и тоа годишно се планираат 600-тини милиони денари или 10 милиони евра вложување во образованието, реконструкции на училишта, реконструкции на игралишта , обнова на помагалата во училиштата, вкупно 10 милиони евра од акцизата назад кај граѓаните, пари кои сега се трошат од страна на оваа влада, ќе бидат наменети за инвестиции во културата, во спортот , вкупно 40 милиони евра во еден мандат, пари кои денеска се крадат наместо да се вложуваат, порача Мицкоски на вечерашната промоција на новите политики.