Премиерот Христијан Мицкоски денеска се сретна со државниот секретар за надворешни работи, Комонвелт и развој на Обединетото Кралство на Велика Британија и Северна Ирска Дејвид Лами.
– Денес на Самитот на европската политичка заедница во Лондон остварив средба и разговарав со Дејвид Лами, државен секретар за надворешни работи, Комонвелт и развој на Обединетото Кралство на Велика Британија и Северна Ирска. Разменивме мислења за актуелните политички теми во регионот и Европа и ја потврдивме потребата од поблиска и потесна соработка на земјите од Европа на полето на безбедносните и енергетските прашања, објави Мицкоски на Фејсбук.
Заклучивме, напиша Мицкоски, дека соработката е неопходна за градење цврсти партнерски односи и економски напредок.
– Се согласивме дека регионот и Обединетото кралство имаат заеднички интерес во областа на безбедноста и градењето на стабилни регионални односи во рамките на евроатланските процеси, се вели во објавата на премиерот Мицкоски.
Мицкоски, потпретседателот на Владата Изет Меџити и министерката за енергетика, рударство и минерални суровини, Сања Божиновска следните денови ќе учествуваат на Самитот на европската политичка заедница.
Домаќин на самитот на Европската политичка заедница е британскиот премиер Кир Стармер, а ќе се одржува во историскиот амбиент на палатата Бленхајм во Оксфордшир, Англија.
Премиерот Мицкоски денеска во рамки на Самитот на Европската политичка заедница во Лондон разговарал и со неговиот колега од Хрватска Андреј Пленковиќ, со црногорскиот претседател Јаков Милатовиќ и со членот на Претседателството на БиХ Денис Беќировиќ при што било потенцирано дека земјите од регионот имаат потреба од економска, енергетска и инфраструктурна поврзаност за што клучно е градењето на силна регионална соработка.
-Во рамки на самитот на Европската Политичка Заедница во Лондон имавме пријателски разговор со премиерот на Хрватска, Андреј Пленковиќ, претседателот на Црна Гора, Јаков Милатовиќ и членот на претседателството на БиХ, д-р. Денис Беќировиќ. Соработката на земјите од регионот е неопходна за просперитетот на државите и благосостојбата на нашите граѓани. Нашите народи имаат потреба од економска, енергетска и инфраструктурна поврзаност, а клучен предуслов за тоа е градењето на силна регионална соработка. Делиме слични вредности и предизвици како регион и тие нé обврзуваат на заедничка кооперативност и комуникација меѓу земјите од Балканот, напиша на неговиот Фејсбук профил премиерот Мицкоски.
Порано денеска Мицкоски се сретна со државниот секретар за надворешни работи, Комонвелт и развој на Обединетото Кралство на Велика Британија и Северна Ирска Дејвид Лами со кого размениле мислења за актуелните политички теми во регионот и Европа и ја потврдиле потребата од поблиска и потесна соработка на земјите од Европа на полето на безбедносните и енергетските прашања.
Мицкоски ја предводи Владината делегација на четвртата средба на шефовите на држави или влади на членките на Европската политичка заедница, што ќе се одржи во замокот Бленхајм во близина на британскиот град Вудсток во грофовијата Оксфорд. Во состав на македонската делегација се и вицепремиерот Изет Меџити и министерката за енергетика, рударство и минерални суровини, Сања Божиновска. Како што најави претходно премиерот Мицкоски во објава на Фејсбук, тој на Самитот ќе говори за „предизвиците коишто следат во делот на енергетиката и економијата од аспект на регионалното поврзување за балканските држави“.
Мицкоски во Лондон имаше кратка средба и со Зеленски
Денеска во рамки на Самитот на Европската Политичка Заедница во Лондон остварив кратка средба и разговор со претседателот на Украина, Володимир Зеленски, објави премиерот Христијан Мицкоски на неговиот фејсбук профил.
– На средбата ја потенцирав недвосмислената поддршка на Македонија кон Украина и украинскиот народ и посочив дека и во иднина можат да сметаат на нашето пријателство. Македонија и македонскиот народ се хумана нација и сочувствуваат во овие тешки историски предизвици и несогледливи последици. Нашите односи се базира на вистинско пријателство од каде произлегуваат принципи, вредности и разбирање, напиша Мицкоски на ФБ.
Фото: Фејсбук на премиерот Христијан Мицкоски
