Од новото раководство на СДСМ и мандатарот Димитар Ковачевски очекувам продолжување на политиките на Зоран Заев, неуспеси и немање стратегија, изјави денеска лидерот на ВМРО-ДПМНЕ, Христијан Мицкоски во одговор на новинарско прашање за време на посетата на Општина Бутел.
– Имав прилика да слушнам едно интервју на Ковачевски, стерилно, буквално не можам да препознам некоја политичка, лидерска реченица која ќе можам да ја коментирам. Затоа очекувам само продолжување на политиките и ништо друго, рече Мицкоски.
Лидерот на ВМРО-ДПМНЕ додаде дека од Ковачевски не слушнал ништо ново и не очекува никаков пресврт во однос на политиките на Владата што тој ќе ја предводи.
Мицкоски истакна дека иако, како што рече, ВМРО-ДПМНЕ е политичка партија со најголема пратеничка група во Собранието и со најмногу градоначалници, претседателот Стево Пендаровски одлучил да го даде мандатот за состав на нова влада на лице „кое не учествувало на изборите, ниту ја побарало довербата, ниту има каков било народен легитимитет“.
Во врска со случајот на екс генералниот секретар на владата Драги Рашковски, кој според наводите, за возило од 50.000 евра, пријавил награда од само 5.000 евра,
Мицкоски посочи дека доколку институциите не реагираат веднаш, само ќе докажат дека се нефункционални.
– Ги повикувам институциите тоа да го истражат и веднаш да покренат постапка затоа што само така ќе докажат дека се непристрасни и дека надвор од политичко влијание, рече Мицкоски.
Во однос на најавата на Владата за доделување на 45 илјади ваучери по 1.000 денари за надминување на енергетската криза, Мицкоски оцени дека тоа е политика „купи ден продај“ и доказ дека власта нема „стратегија ниту знаење за справување со енергетската криза во државата“.
