Пратеникот од ВМРО-ДПМНЕ, Антонио Милошоски смета дека резултатите од првиот круг на претседателските избори се најава за тоа дека власта е менлива и затоа овој прв круг најавува дека во државата постои атмосфера за политички промени.

Според него, резултатите од првата рунда се црвен картон за власта. И затоа требаше да се прифати предлогот на ВМРО-ДПМНЕ за предвремени парламентарни заедно со претседателските избори, па народот да каже кој е за метла, а кој за мандат, а не Заев да прави “субјективна метла”, според тоа кој му се допаѓа, а кој не, истакна вечерва Милошоски.

-Резултатите од гласовите за Гордана Силјановска Давкова се одраз на волјата на народот. Ако ги споредиме резултатите на ВМРО-ДПМНЕ и коалицијата од локалните избори кои изнесуваат 335 илјади гласови, но тогаш заедно со турската партија и партијата на Амди Бајрам и други, кои денес се со владеачката коалиција, значи ако ги одземеме нивните гласови, реално сме имале некаде околу 325 илјади гласови, а професорката Силјановска има 320 илјади што цениме дека е добар резулатат. Особено што наспроти неа имате една коалиција од 31 партија. Драго ми е да изјавам дека на ниво на Скопје, професорката Сиљановска имаше подобар резултат од Стево Пендаровски, како и во некои бастиони на СДСМ како што е Куманово, вели Милошоски.