Во угостителски објект во тетовско Жеровјане утрово во периодот од 01.30 до 05.00 часот приведени се шест лица од страна на полицијата.
МВР денеска соопшти дека полициски службеници од СВР Тетово, при контрола во угостителски објект во тетовско Жеровјане, сопственост на А.А.(30) од тетовско Боговиње, затекнале 12 лица, од кои седум од Србија, две од Русија, едно од БиХ и две од нашата земја, како и 41 лице – гости во објектот.
Во објектот биле пронајдени четири безбол палки, а во близина на објектот биле пронајдени две парчиња огнено оружје „Шкорпион аграм 2000“, со рамка со два куршуми калибар 9милиметри и револвер со муниција.
– Сопственикот на објектот А.А. е лишен од слобода, а приведена е Е.З.(27) од Босна и Херцеговина, поради злоупотреба на туристичкиот престој, како и Б.А.(24) од скопски Сарај и Т.И.(21) од гостиварска Долна Бањица, кај кои биле пронајдени ножеви, додека А.Х.(23) од Германија и Џ.Л.(39) од тетовско Горно Палчиште непоседувале документи за идентификација, се наведува во соопштението.
По целосно документирање на случајот, против сопственикот на објектот и другите приведени ќе следуваат законски предвидените поднесоци.
