Законска обврска на граѓаните е, според Договорот со Грција од Преспа, до февруари идната година сите документи на граѓаните во Република Македонија да бидат со придавката Северна.
Промената на документите на граѓаните (пасоши, лични карти и др.) освен што ги чини пари, бидејќи се на нивни трошок, предизвикува нервози и ги чини трошење нерви, бидејќи многумина се жалат дека имале тешкотии при закажувањето на термин за вадење нов документ.
И министерот за внатрешни работи Оливер Спасовски деновиве потсети дека граѓаните мора да ги извадат новите документи, бидејќи по февруари 2023 година нема да важи ниеден документ и да не е со изминат рок на важност ако не е со новото име на државата и придавката Северна.
Во врска со овој проблем објава на Фејсбук од писателката Ксенија Николова предизвика внимание, реакции и коментари од граѓаните.
Во продолжение ја пренесуваме објавата на Николова на социјалните мрежи:
Одмага системот кој треба да им помага на граѓаните
Вака сега, збор два околу електронскиот систем за закажување термини за промена на пасош, лична карта и возачка дозвола.
На телефон никој не се јавува, нема сигнал, не можеш да добиеш ни за жива глава. Ок, затоа постои електронскиот систем што мене секогаш ми е подообра опција, секако АКО ФУНКЦИОНИРА.
Системот не само што не функционира туку е неверојатно погрешно направен, небаре сами побарале да им направат систем кој намерно е создаден за да не им заврши работа на граѓаните.
Прво, не можеш да одбереш пакет на документи одеднаш, на пример не можам да одберам дека сакам промена на сите три документи што е секако моменталната потреба на секој од нас. Мораш за секој документ посебно да закажуваш.
Второ, треба да ПОГОДУВАШ кој термин е слободен, зашто системот не ти покажува слободни термини во наредниот период, туку едноставно како игра на среќа одбираш датуми, за после да ти излезе едно прозорче дека нема слободни термини во тој ден, во тој час. Па пак одново и така во круг.
Трето, кога конечно ќе помислиш дека решението е да одбереш термин во ноември, тогаш ти излегува прозорец дека можеш да закажеш термин само во наредните 60 работни дена.
Чекај малце, сериозни сте?
Не знам кој ви го правел електронскиот систем, не знам колку пари сте дале за да ви се направи тој систем, ама можам да ви кажам дека системот во ниеден случај не им помага на граѓаните туку напротив, ИМ ОДМАГА!
Не знам дали целта е да се одбере брза постапка или да се фаќаат врски, вие си знаете, како и да е СРАМОТА Е!
Секогаш сум објективна, секогаш сум трпелива, ама ова е неприфатливо! Апел до вашите служби, КРЕВАЈТЕ НА ТЕЛЕФОН и доста ги малтретирате граѓаните!
