Надвор од мрежа се трите блокови по тешка хаварија во котелскиот дел на БЛОК 3 која се случила синоќа, а веќе подолг период по тешките хавари надвор од мрежа се Блок 1 и Блок 2, објави Комисијата за енергетика на ВМРО-ДПМНЕ.
– Денес, најголемиот производител на електрична енергија, стожерот на македонската енергетика е паднат на колена и наместо да произведува, троши скапа увозна струја со цел да не дојде поголема хаварија на постројките кои остануваат без внатрешно напојување! Во текот на ноќта испаднал БЛОК 3 по хаварија во котелскиот дел од електраната , кој подолго време бил експлоатиран со технички проблеми поради несоодветниот скап увозен јаглен. Дали повторно станува збор за огромна хаварија по која Блокот беше забетониран и надвор од мрежа повеќе месеци? Дали повторно ќе плаќаме милионски суми за санација на последиците се само дел од одговорите кои ги чекаме од менаџерскиот тим, кој вчера вечер се забавуваше во хотелот Молика пеејќи песни. Дали ваквото дилетанско, неодговорно, клептоманско и мафијашко управување со енергетските објекти е дел од планираното сценарио на СДСМ најавено како зелена енергетска стратегија и престанок на работа на РЕК Битола? Дали СДС успеа во својот план конечно да го запре производството во РЕК Битола со тоа што ги уништи 3 блока?!- се вели во соопштението.
Колку ќе ги чини граѓаните увозот на електрична енергија, се додава натаму во реакцијата од Комисијата, колку чини секој испад, поради нестручноста при санацијата?
– Колку чини неработењето на аматерскиот менаџерски тим дојден во РЕК Битола ако знаеме дека во последните 20 дена имало повеќе од 5 вклучувања, а едно вклучување е околу 500 000 евра? Бидејќи повеќе од 50% од домашното производство на електрична енергија во земјава доаѓа од РЕК Битола, повеќе од јасно е дека по најновата хаварија ќе мора да се изврши интервентен увоз на електрична енергија, а цехот на крајот ќе го платат граѓаните. Сериозноста на состојба е уште поголема ако знаеме дека надвор од функција се и другите производствени капацитети поради лошо ремонтирање и одржување, а хидро-потенцијалот речиси на минимум. Згора на сѐ, МЕПСО е под хакерски напад и не знаеме како ги управува постројките во електроенергетскиот систем. Раководствата на Електрани на Македонија, РЕК Битола и МЕПСО мора да понесат одговорност! Во интерес на навремено информирање, бараме Владата во заминување веднаш да го разреши најнеспособното раководство на ЕСМ, да се поведе истрага и да се казнат виновниците со цел да не се дозволи прикривање на доказите!, се наведува во соопштението од Комисијата за енергетика.
Со објава на Фејсбук реагираше и пратеничката од ВМРО-ДПМНЕ Силвана Ангелевска.
– Денес во РЕК Битола испадна и третиот блок и во моментот имаме 0 (нула) производство на електрична енергија. Оваа криминогена власт на ДУИ и СДС успева во своите намери да го затвори РЕК Битола, столбот на електроенергетскиот систем во Македонија. Ова е резултат на елементарната неспособност и византиските игри меѓу ДУИ И СДС кој да добие повеќе криминални тендери. Време е да ставиме крај на овој хаос на 8ми мај, а потоа следи одговорност, пишува Ангелевска на Фејсбук.
