Едно одделение од 29 ученици годинава ќе биде помалку во Струмица, во споредба со лани, според бројот на првачиња запишани за оваа учебна година.

– Основните и средните училишта во општина Струмица се подготвени за започнување на новата учебна година, информира градоначалникот Коста Јаневски по посетата на неколку во градот.

Тој додаде дека во споредба со лани запишани се 29 ученици помалку во прво одделение, односно вкупно се запишани 531 ученици, од кои 451 во општинските и 80 во подрачните училишта. Лани биле запишани 560 првоодделенци, а во подрачните училишта во селата Попчево, Габрово, Раборци, Дорломбос и Мемешли годинава не се запишани деца во прво одделение.

Причините за драстичното намалување на бројот на првачиња не се споменати.

-За новата учебна година, општина Струмица за првпат од својот буџет издвојува средства за ужина на ученици од основното образование во висина од 2.022.440 денари и 600.000 денари за набавка на училишен прибор за учениците од основното образование од социјално загрозените семејства. И годинава општина Струмица обезбеди 650 илјади денари за училишни униформи за сите ученици од прво одделение, рече градоначалникот Јаневски.

Покрај тоа, обезбедени се 1.693.587 денари за инвестиции, од кои е поставена меѓукатна конструкција во ООУ „Маршал Тито“ во Струмица, како и замена на подот и дотраените плочки со нови по скалите, влезот и терасата и набавка на врати со каси во висина од еде милион денари, а останите средства се инвестирани во поставување нови внатрешни врати,промена на подот, санација на ѕидовите и реконструција на фасадата во подрачните училишта во селата Банско и Водоча.

Во новата учебна година во трите средни училишта во Струмица во прва година се запишале вкупно 753 ученици.