Срамота е, тоа покажува на што сè се подложени Македонците во Бугарија, вели претседателот на ОМО Илинден Пирин Стојко Стојков за декларацијата со која Советот на Општина Благоевград го забрани отворањето на македонскиот клуб Никола Вапцаров.
Како што објавивме вчера, образложението е дека Благоевград „нема да биде центар за слични пропагандни провокации и дека таму нема место за македонисти“.
– Овие луѓе во Советот на Благоевград, ако не се Македонци, имаат роднини и пријатели кои се. Тие знаат дека има многу Македонци во Бугарија и во Благоевград. За да излезат со таква позиција, објаснување е само дека се создава атмосферата на страв и омраза против Македонците овде, изјави Стојков за Слободен печат.
Клубот го отвора Македонското здружение за заштита на основните индивидуални човекови права. Стојков вели дека за декларацијата на Благоевград дознале од медиумите и сè уште не ја добиле одлуката.
Тој додава дека досега немале контакт со македонската влада во врска со отварањето на овој клуб, и покрај тоа што во април, кога се отвораше бугарскиот клуб Ванчо Михајлов во Битола, премиерот Димитар Ковачевски најави дека ќе има реципроцитет со Бугарија и дека есенва ќе се отвори македонски клуб во Благоевград.
– За жал, нема ништо од македонската влада. Но, и тие ќе бидат поканети на отворањето, вели Стојков.
