Ескалацијата на односите меѓу Македонија и Бугарија оди во корист на трети страни кои не сакаат двете земји да бидат во добри односи. Со ваков став вчера излегоа шефот на македонската дипломатија Бујар Османи и бугарскиот европратеник Илхан Ќучук. Од опозициската ВМРО-ДПМНЕ, пак, побараа Владата да ги испита наводите дека странски агенции се вмешани во провокациите.

Според министерот за надворешни работи Бујар Османи, Руската Федерација е еден од факторите на кои им е од интерес да се одржат живи конфликтите во овој регион, со цел полесно да може да се манифестира влијание.

Во интервју за Радио Слободна Европа, прашан дали смета дека руската разузнавачка служба ги „поткопува“ македонско-бугарските односи, Османи со одговор дека нема такви директни информации.

-Јас немам такви директни информации, меѓутоа дека има интерес на трети фактори да се одржат живи конфликтите во овој регион, некогаш и замрзнати, со цел полесно да може да се манифестира влијание во нашиот регион, тоа е веќе позната работа од поодамна и тоа влијание сме го виделе во различен интензитет, во различни периоди на односите, не само меѓу Бугарија и С. Македонија, туку воопшто на Западен Балкан. Така што сигурно последната ескалација ќе биде добредојдена за многу трети фактори, коишто ќе видат шанса тука да се одржи еден перманентен конфликт. Дали е тоа во наш интерес? Јас не се согласувам, вели шефот на дипломатијата.

И европратеникот Илхан Ќучук ја дели оценката на Османи дека има надворешни фактори кои не сакаат Бугарија и Македонија да бидат во добри односи.

– Тоа се оние луѓе кои не сакаат РСМ да биде дел од Европската Унија. Тоа се оние луѓе кои не сакаат нашата држава да има влијание бидејќи ставањето вето значи дека Бугарија нема пријатели на Балканот, во ЕУ, изјави Ќучук за „БТВ“.

Ќучук е категоричен дека мора да инсистираат во Македонија да има владеење на правото и високи демократски стандарди, бидејќи вели, „се додека не се признаваат правата на луѓето кои се сметаат за Бугари, тензијата ќе продолжи“.

Според него, треба да се поттикнат сите обиди за намалување на тензиите од двете страни и да се најде решение за проблемите.

Од опозициската ВМРО-ДПМНЕ, пак, вчера излегоа со барање до власта да ги испита наводите дека здруженија, фондации, поединци и  странски агентури се вмешани во провокациите кон земјава. Оттаму побараа да се истражи и финансирањето на бугарските клубови, а од Бугарија да ги почитува пресудите од Стразбур.

– Македонските институции мора да се спротистават на отворената кампања против Македонија. Финансиските институции на власта да го проверат финансирањето на дел од овие здруженија и внесот на странски пари и потеклото на тие пати со кои што овие здруженија во државата тераат антимакедонска политика. Бараме Владата и министерот за надворешни работи да се заинтересираат за делувањето, целта и постоењето на бугарско здружение во Корча, соседна Албанија каде што во целата област живее мнозинско македонско население. Бараме македонската влада да побара доследно спроведување на пресудите добиени во Судот за човекови права во Стразбур во насока на заштита и признавање на засебноста на Македонците во Бугарија, изјави вчера потпретседателот на ВМРО-ДПМНЕ Александар  Николоски на прес-конференција.

Отсуството на државна стратегија, според Николоски, не довело до точка на студена војна со Бугарија, а последната декларација усвоена од бугарската Комисија за надворешна политика е потврда дека бугарските барања немаат крај.

Во пресрет на чествувањето на роденденот на Гоце Делчев, Скопје и Софија уверуваат дека сакаат да дојде до намалување на затегноста во односите, но секоја од страните од своја перспектива гледа на настаните кои доведоа до тоа. Претседателот Стево Пендаровски очекува 4 февруари да помине во атмосфера каква што доликува, во црквата „Св. Спас“ и во околината, и дека ќе се чествува тој ден како што доликува на една цивилизирана демократска држава.

По повод чествувањето на 151 – годишнината од раѓањето на Гоце Делчев, а со цел тоа да помине во мирна и пријателска атмосфера, задолжени се Министерството за внатрешни работи и Агенцијата за национална безбедност во координација со соодветните служби во Република Бугарија да ги обезбедат сите услови за достоинствено чествување. За таа цел, денеска во Скопје ќе допатуваат бугарскиот министер за внатрешни работи Иван Демерџиев и директорот на државната агенција „Национална безбедност“ Пламен Тончев.