ОСМАНИ НЕ И ВЕРУВА НА ИСТРАГАТА: Мене ми е важно што кажува Христијан и мајка му, а не истрагата за случајот во Охрид

Мене ми е важно тоа што го кажува самиот Христијан и мајката на оштететниот, вели министерот за надворешни работи Бујар Османи и дека нему не му е важно што ќе каже истрагата за нападот на секретарот на бугарскиот клуб Цар Борис Трети, Христијан Пендиков во Охрид.

Тој ова го кажува во интервју за бугарската телевизија БТВ.

Османи вчера беше да го посети Пендиков во болница во Софија, откако тој беше пренесен таму на лекување со бугарски владин авион.

– Мене ми е важно тоа што го кажува самиот Христијан и мајката на оштететниот, а тоа е дека е поради изразување на етничка припадност, и покрај тоа што еве сторителите кажуваат обратно, дека имале претходно некакви си разлики“, рече Османи во интервјуто.

Тос свој став Османи го потенцира и подоцна во интервјуто.

– Како што кажав за случајот на Христијан, не ми е важно што ќе каже истрагата. Мене ми е важно што родителот на Христијан вели дека бил нападнат поради бугарска етничка припадност. И мене ми е тоа доволно за денес да дојдам во Софија и да пратам порака, вели Османи.

Прашан за имињата на бугарските клубови во Македонија, како Цар Борис Трети и Иван Михајлов, дали ќе треба да ги променат имињата, Османи вели дека ќе треба, иако тој имал дилеми околу законот што го донесе Собранието.

– Така вели законот. Ќе бидам конзистентен, јас лично имав дилеми по однос на ретроактивното важење на законот, меѓутоа, одлуката на Собранието е таква што имињата не треба да бидат поврзани со периоди кои што се сметаат, како што е фашистичкиот период од Втората светска војна, кои што ги повредуваат чувствата на граѓаните, вели Османи.

Тој најави дека по следната недела планира да ги покани бугарските здруженија на состанок да направат план како да ѝ овозможат на бугарската заедница да ги декларира припадноста, идентитетот и културната припадност и да се интегрира во општеството.

Османи рече дека тој лично, како припадник на немнозинска заедница, има искуство со дискриминација и поради тоа се чувствува најповикан да ја советува бугарската заедница во Македонија.

– Доколку има дискриминација, верувам дека можеби има дискриминација, велам повторно од моето искуство. Исто пред 20-тина години велеа дека нема дискриминација кон останатите заедници, но имаше, вели Османи.