Македонскиот вицепремиер за европски прашања Бујар Османи в четврток во Брисел ќе оствари средба со еврокомесарката за трговија, Сесилија Малмстром, на која ќе се разговара за последиците од американските заштитни царински мерки против извозот на челик и алуминиум.
Одлуката на администрацијата на Доналд Трамп за воведување царини кон нејзините трговски партнери може да ја погоди и Македонија, го предупредија вчера Османи македонските бизнис асоцијации, бидејќи би можеле да ги доведат во прашање условите под кои се извезува македонскиот челик на европскиот пазар. Македонија стравува дека со мерките воведени од САД кон ЕУ, Унијата би можела да се одлучи за рестриктивни мерки кон трети земји, што би ги погодиле македонските производители на челик. Таква одлука, сепак, ЕУ сѐуште не донела, но македонската економија сака да се информира за следните чекори за кои размислуваат европските челници во контекст на оваа трговска „војна“, и да се обидат да превенираат негативни последици за македонската економија, брифираат дипломатски извори во Брисел за МИА.
Европскиот и американскиот пазар се важни за македонските производители. Пред неколку недели Здружението на металургија при Стопанската комора во Македонија предупреди дека европските и американските рестрикции врз челикот би ја чинеле земјата околу 15.000 откази за вработените во таа индустрија, а 5 проценти од домашниот бруто производ на Македонија оваа година доаѓа од извозот на челик и алуминиум и претставува 15 проценти од вкупниот извор.
Македонија смета дека треба да биде исклучена од рестриктивните мерки на ЕУ во согласност со Договорот за Стабилизација и Асоцијација што е склучен со ЕУ.
