Претседателот Стево Пендаровски, по повод големиот муслимански празник Рамазан Бајрам, упати честитка до граѓаните со исламска вероисповед и до поглаварот на Исламската верска заедница Реис–ул–улема Хаџи Сулејман ефенди Реџепи.
–Во овие празнични денови на слога, заедништво и почит, сите заедно треба да продолжиме кон градење на соживот за сите граѓани и да изградиме едно општество за сите, пример за идните наши генерации. Со овој голем празник се означува крајот на едномесечниот пост во кој секој верник искрено го отвора срцето за верата и љубовта, наведува Пендаровски во честитката.
Светиот месец Рамазан, посочува, е месец на дарување, помагање и заедништво и ова ја зајакнува вербата во доброто, правдата и меѓусебното разбирање и почитување. Посакувам овие вредности да бидат наше секојдневие и сите да имаме спокоен и среќен живот, не само во празничниве денови, туку низ целата година.
– Би сакал на овој голем празник да го истакнам придонесот на ИВЗ и нашите сограѓани од исламска вероисповед во градењето на мир и соживот во мултиетничка и мултирелигиозна РС Македонија. Нашата заедничка цел е просперитетна и европска татковина. Уште еднаш, Ви упатувам најискрени желби за љубов, среќа и благосостојба, наведува Пендаровски упатувајќи честитки до поглаварот на ИВЗ, членовите на Ријасетот, муфтиите, имамите и на сите граѓани од исламска вероисповед во државава.
