Во Домот на Армијата во Скопје денеска беше одбележан Денот на воената служба за безбедност и разузнавање, што се совпаѓа и со јубилејот – 30 години постоење на оваа воена служба.
На свеченоста, министерката за одбрана Славјанка Петровска порача дека членството во НАТО преставува ново поглавје во историјата на оваа служба, која има проширен обем на работа и поголема одговорност.
– Членството во Алијансата е придобивка за безбедноста и стабилноста на државата, а од друга страна токму тоа ја наметнува потребата за развој на воените капацитети и способности кои ќе дадат придонес во колективната безбедност. Бројот на луѓе за чија безбедност сме одговорни се зголеми од 2 на околу 900 милиони, рекла министерката Петровска, соопштија од МО.
Таа истакнала дека одбраната со своите капацитети мора одлучно да се спротивстави на новата безбедносна реалност и тоа со брзи и ефикасни активности за заштита, превенција и одговор на овие закани.
Прв чекор кон изградба на безбедно општество, смета Петровска, е воспоставување на еден сеопфатен пристап во справувањето со хибридните закани.
– Наша обврска како земја – членка на Алијансата е да инвестираме во изградба на национална отпорност на овие закани и да изградиме синхронизиран систем за нивен одговор, нагласила министерката Петровска и додала дека институциите мора да бидат координирани и да соработуваат и во справувањето со тероризмот, кој претставува глобална закана.
Полковникот Ивица Ампов, раководителот на воената служба, на свеченоста се осврнал на значењето на военото разузнавање во одбранбениот систем и се заблагодарил на вработените во службата за својата професионалност и посветеност.
На одбележувањето на Денот на военото разузнавање, во присуство на началникот на Генералштабот, генералот Васко Ѓурчиновски, биле наградени и пофалени вработени во службата за воено разузнавање. Благодарници за соработка им се доделени на Агенцијата за национална безбедност, Агенцијата за разузнавање и Бирото за јавна безбедност.
