Под слоганот „Напрај се Василичар“ денеска почнува Вевчанскиот карневал, на кој се најавуваат над 1.000 маски и богата програма со културно – забавни содржини. Организаторите на карневалот очекуваат голем број посетители, напоменувајќи дека голем дел од туристичките капацитети во околината веќе се полни.

-Вевчани е веќе полно со туристи, сите капацитети во и околината се веќе полни. Вевчанци и посетителите со нетрпение чекаат да ги видат маските кои се подготвуваат 365 дена, а многумина ги прават и последните подготовки за да се приклучат на уличниот театар и да го заиграат Василичарското оро, велат организаторите ка карневалот.

Општината како организатор, под покровителство на Министерството за култура, е подготвена да ги пречека гостите од земјава и од странство. Сепак, најголем број на посетители, домаќините очекуваат утре на 13 јануари, кога ќе се одржи главното дефиле на маските во центарот на Вевчани.

Забавната програма денеска ќе започне од 19:00 часот, а утре музичката програма започнува во 21:00 часот. Вторник, 14 јануари, е резервиран за традиционалното василичарско оро и палење на маските.

Програмата за Вевчански карневал за 2020 покрај традиционалните обреди вклучува и неколку новитети. Преку кулинарското шоу, Бранко Попоски, food blogger кој стои зад проектот Cooking with Branko, ќе ги запознае гостите со кујната карактеристична за овој крај.

За музичкиот дел ќе се погрижат македонски изведувачи од различни жанрови како македонското поп-рок дуо Eye Cue, Brass Brothers, DJ Todoroff, македонските музички фолк ѕвезди Дамјан Стојановски и Татијана Стефановска, а по барање на публиката, општината се погрижи да ја донесе музичката ѕвезда, Влатко Лозаноски.

Организаторите и годинава најавуваат многу смеа, игра, театар и маски, кои ќе го привлечат вниманието на јавноста задржувајќи ја својата уникатност и архаичност.

Вевчани ги живее своите два дена возбуда со маски

Вевчани наредните два дена ќе пулсира во знакот на хуморот, сатирата, но и отворената критика кон негативното во секојдневието, кон општеството, светот, сето прикажано низ колоритните маски што ќе бидат дел од годинашното издание на познатиот Вевчански карневал.

Цела година луцидните вевчанци ги изработуваат своите маски што традиционално ги презентираат на 13 јануари, на главниот настан во годината за нив – познатиот Василичарски карневал посветен на Свети Василиј Велики, што како бренд се наметна низ годините како најуникатната културна манифестација во земјава.

Нивните креации се сработени со единствена цел – смешен, подбивен начин да исмејуваат познати, непознати ликови и да коментираат настани што ставија печат на старата 2019 година што изминува. Не случајно што изминува, затоа што за вевчанци Новата 2020 година пристигнува на 14 јануари, а тоа правило го почитуваат и гостите. Сите тука слават, а портите на домаќините, на сите куќи во селото овие два дена се отворени за секого. Жителите на ова село знаат како се пречекува гостин – со вино, греана ракија, мезе, сето зачинето со шега и насмевка.

Манифестацијата почнува денеска, со изложбата на Билјана Јуруковски која низ авторски израз ќе го презентира своето видување на Карневалот. Веднаш потоа следува гурманското шоу „Вкуси го Вевчани“, или „Cooking with Branko“. Градоначалникот на Општината Сашо Јанкоски заедно со директорот на Агенцијата за туризам Љупчо Јаневски ќе се сретнат со угостителите од општина Вевчани, сопствениците и менаџерите на ресторани, кафеани, кафе-барови во селото. Традиционално, вечерта е резервирана за добра забава, со богата програма за која овојпат се задолжени DJ Todorоff, „Brass Brothers“, „Еye Cue“ и Влатко Лозаноски.

Карневалските свечености продолжуваат утре со централниот настан на манифестација – главното дефиле на василичарите со маските низ улиците на вевчанската „держава“, како што си го викаат селото самите вевчанци. Тоа е таа поворка за која се вели дека „се може да се одложи, само Вевчанскиот карневал не“. Тој ден забавата трае од зората до другиот ден. После дефилето чиј почеток е предвиден за од 14 часот, организирана е голема сенародна забава со настапите на Дамјан Стојановски, Татијана Стефановска и Дувачкиот оркестар „Весела дружина“.

Вевчани од 1993 година е член на Здружението на европски карневалски градови. Организаторите секоја година се грижат манифестацијата да биде збогатена со некоја новина. Самиот карневал има интернационален дух бидејќи на него учествувале и гости од странство. Досега со свои маски низ вевчанските сокаци продефилирале и учесници од Бугарија, Србија, Хрватска, Босна и Херцеговина, Турција…И сето тоа пред повеќеилјадна публика, од целата држава, но и бројни гости од странство кои добро знаат што се се случува овие два дена во годината во Вевчани.

На 14 јануари, кога се слави првиот ден од Православната или Стара нова година, останува да се заврши и онаа процедура според обичајот – точно на пладне на сред село да се палат маските од веќе изминатот карневал. Така е во Вевчани со години наназад. И уште тогаш, додека со палењето на старите маски се сумираат впечатоците, веќе се јавуваат и првите идеи, се планираат маските за наредното карневалско издание.