ПОДДРШКА ЗА ЗЕМЈОДЕЛЦИТЕ: Тргопродукт на Заеви доби неповратен грант од 1,4 милиони евра од Агенцијата за помош на земјоделството

Тргопродукт, една од компаниите во сопственост на членови на фамилијата на експремиерот Зоран Заев, добила неповратен грант од 1,4 милиони евра од ИПАРД-програмата преку Агенцијата за финансиска поддршка на земјоделството и руралниот развој, објави порталот Фактор.

Според Фактор, компанијата од струмичко Дабиле, која се занимава со откуп на овошје и зелечук и го поседува брендот Мамас, на 21 април добила исплата од 86.608.249 денари. Оваа сума следува како учество во инвестициски проект и е втора најголема дадена како грант во историјата на земјоделскиот фонд откако се работи со ИПАРД-програми.

– Финансиската поддршка за корисникот ДПОЗ Тргопродукт ДООЕЛ изнесува 86.608.249 денари за набавка на опрема за прием, обработка и преработка на земјоделски производи и опрема за полнење, затворање, пастеризација, пакување и етикетирање на производи, односно 75% ЕУ учество во износ од 64.956.187 денари и 25% национално учество во износ од 21.652.062 денари, се вели во објаснувањето на Агенцијата за финансиска поддршка на земјоделството и руралниот развој.

Извор: Фактор