Денеска го одбележуваме 13 Ноември, Денот на ослободувањето на Скопје. Ден кога пред 77 години борците од 42. и 50. Народноослободителна дивизија и 16. Македонска бригада, како и од другите партизански единици, станаа дел од завршните операции за ослободување од фашистичката окупација и за остварување на сонот за сопствена и самостојна држава, со Скопје како нејзин главен град, напиша премиерот Зоран Заев на „Фејсбук“.
Ова, како што посочува Заев, е ден кога се сеќаваме на херојството, кога им се поклонуваме на жртвите, борците и на цивилното население кое заедно со партизаните се бореа за секоја улица на нашиот град, и се сеќаваме на радоста на скопјани и на ослободителите на развиеното знаме на слободата на тогашниот Офицерски дом.
– Скопје памети многубројни закани и природни катастрофи, но градот секогаш повторно и повторно се кревал и закрепнувал и ги нижел своите победи. Победите на Скопје се неделиви од неговите скопјани чиј дух е запишан во бројни записи кои остануваат како сведоштва за взаемната љубов на градот и неговите граѓани, секогаш насочени кон подобра иднина на метрополата. Нека ни е честит и вековит 13 Ноември – Денот на ослободувањето на Скопје, напиша Заев.
Но, Заев никаде не спомнува кој бил фашистичкиот окупатор против кој се бореле партизаните. Познато е, и од негови изјави, дека тој лично се залагал за бришење на „бугарски“ од спомениците на кои пишува фашистички окупатор.
