Ако падне Талат Џафери паѓа владата, затоа Ковачевски прави будала од себе и не смее да го осуди дивеењето на собтанискиот спикер во Собранието на Македонија, се истакнува во денешната реакција од ВМРО-ДПМНЕ.
– Ковачевски е толку уплашен од Џафери што вчера мораше да гледа и фудбал со него, само за да покаже пред јавноста дека стои зад Џафери, и да го понесе срамот врз себе. До кога Ковачевски ќе продолжи да прави будала од себе за да не му излезе ДУИ од влада? Сите го слушнаа Талат Џафери како пцуе вработени во собранието и врши мобинг врз нив, само Ковачевски едвај чека јавноста да заборава на случајот, за да не мора да го осуди Џафери и да не му се налути ДУИ, се вели во реакцијата.
Ковачевски, се додава во соопштението од опозициската партија, само за да остане на власт е спремен да премолчи се, па дури и малтретирањето на вработените во Собранието од страна на Џафери.
– Ковачевски е спремен на се, па дури и да се слика со примитивецот од Форино, додека цела јавност се згрозува, само да поседи уште некој ден во фотелјата во влада. Ковачевски е срам за државата исто колку и Џафери, затоа што за власт е спремен да жртвува десетина човечки судбини и да ги остави луѓето да бидат шиканирани од Џафери, се вели во реакцијата од ВМРО-ДПМНЕ.
Наспроти оваа реакција, Ковачевски по скандалот изјави дека ја видел снимката од Собранието, но не можел да утврди чиј бил гласот што ги пцуеше и врескаше по вработените службеници во парламентот. А вчера, премиерот Ковачевски навиваше на фудбалскиот натпревар во Чаир за екипата на ФК Скопје, заедно со Џафери, пратеникот и лидер на ДУИ, Али Ахмети, вицепремиерот Артан Груби и други партиски функционери и министри од ДУИ.
