Тринаесет години затвор му одреди Судечкиот совет на обвинетиот Насер Ештрефи во случајот со убиството на Ангел Петковски. Во изречената казната затвор се пресметува и времето кое обвинетиот го има поминато во притвор и секое лишување од слобода, а кое изнесува нецели седум години.

Судечкиот совет при изрекувањето на пресудата информира дека му било многу тешко да ја донесе оваа одлука, бидејќи се работи за два млади животи од кои едниот го загубил, а на другиот му бил прекинат со издржувањето на казната.

Јавниот обвинител Дарко Јакимовски, од Судот побара на обвинетиот да му се изрече мерка притвор, додека бранителот на обвинетиот Иванка Јакимовска, побара мерка куќен притвор, по што Судот одлучи мерката притвор спрема обвинетиот Насер Ештрефи да се продолжи до правосилноста на пресудата, односно до отпочнувањето на издржувањето казна затвор.

Убиството на Ангел Петковски се случи на 19 мај 2014-та година, во населбата Ѓорче Петров. Инцидентот започна со кражба на велосипед од страна на Насер Ештрефи од скопското село Грчец.

Обвинетиот Насер Ештрефи, претходно, со одлука на Основниот кривичен суд Скопје, потврдена од скопска Апелација, беше осуден на 14-годишна затворска казна. Одлуките ги укина Врховниот суд и судењето против обвинетиот Ештрефи беше вратено на повторно одлучување.

Во рамките на повторното одлучување, по седум години од убиството на Петковски, на 4 март оваа година, беше извршена реконструкција кај Очната клиника во Ѓорче Петров, по одлука на Основниот кривичен суд Скопје, а на барање на одбраната на обвинетиот.

Случајот го водеше судијката Диана Груевска-Илиевска, а застапник на обвинението беше јавниот обвинител Дарко Јакимовски.

Ниту една казна не може да ни го надомести синот, изјавија родителите на убиениот Ангел Петковски

Родителите на Ангел Петковски, за чие што убиство денеска беше објавена пресудата од 13 години затвор за обвинетиот Насер Ештрефи, изјавија дека за нив како родители казната е многу мала и дека ништо не може да го надомести нивниот син. Најавија дека ќе продолжат да ја бараат правдата.

– Нашата штета не може никој да ни ја надополни бидејќи Ангел беше првото внуче на мојот татко во куќата, и тој го носеше името на својот дедо. Во нашата православна вера Ангел значи многу нешта, тоа е свето име, изјави таткото на Ангел, Сашо Петковски, кој воедно беше и сведок во случајот со убиството на неговиот син.

Петковски дополни дека и доживотно да го осудат обвинетиот, тоа не може да го надополни нивниот Ангел, кој им бил повреден од целата земјина топка.

– Затоа што тоа дете беше воспитувано, заврши медицина четврта година, му направивме матура, три дена после матурата го изгубивме нашето дете кое беше за пример. Во Ѓорче Петров и ден денеска го бараат неговите другари, а ние деноноќно уште сме во кошмари и го бараме и се надеваме дека еден ден ќе ни се врати, но не е возможно, дополни Петковски.

Убиството на Ангел Петковски се случи на 19 мај 2014 година во населбата Ѓорче Петров. Инцидентот започна со кражба на велосипед од страна на Насер Ештрефи од скопското село Грчец.

Судот денеска му одреди казна затвор од 13 години на обвинетиот Насер Ештрефи, со тоа што во казната затвор се пресметува и времето кое обвинетиот го има поминато во притвор и секое лишување од слобода, а кое изнесува нецели седум години.

Случајот го водеше судијката Диана Груевска-Илиевска, а застапник на обвинението беше јавниот обвинител Дарко Јакимовски.