На 300 работници на ЈКП Тетово не им се платени придонесите шест месеци. Поради тоа се одлучија да излезат на протест и на тој начин да го изразат нивниот револт. Предупредија, доколку придонесите не им бидат платени, ќе престанат да го чистат градот. Повеќето од нив имаат хронични болести, а целата плата ја трошат на лекови, се вели во прилогот на ТВ 21.
„Протестирам поради тоа што шест години и шест месеци сум без здравствено осигурување, без решение за работа, плус тоа секој месец ми фалат 2 илјади денари и немам каде да се жалам“, вели работник.
„Протестираме за здравствено осигурување, наместо да ги купиме лековите за 200 денари ние плаќаме 2000 денари, и платата ми оди за лекови. Јас за време на пандемија немам одено на работа 2 месеци бидејќи имам срцева болест. Има и такви кои трошат по 8 илјади денари за лекови“, додава друг работник.
„Но, не е направено, ни ветија пред повеќе од еден месец!“
Директорот на претпријатието вели дека неисплатата на придонесите е резултат на тоа што граѓаните не ги плаќаат сметките.
„Претпријатието е погодено со 26 милиони денари и ние не успеавме освен за плати и други обврски, како што се нафта и други, да ги исплатиме придонесите поради тоа што граѓаните не ги плаќаат сметките на ЈКП Тетово“, вели Џељал Цека.
Тој се надева дека Владата со ребалансот на Буџетот ќе најде решение и за овие работници, но не пред да поминат 2 месеци.
„Верувам дека ќе најдеме решение за месец и пол до 2 месеци за проблемот со придонесите на работниците“, додава Џека.
Над 300 работници за време на пандемија постојано одеа на работа, а владата на ова категорија не и понуди финансиска помош. На нив од март месец не им се платени придонесите за пензиско и здравствено осигурување, а има и работници кои веќе 6 години работат со договор на дело.
