Според последните извештаи, четири лица загинале, а повеќе од 30 се повредени во нападот во средното училиште Апалачија во Виндер, американската сојузна држава Џорџија.

Како што јави Си-Ен-Ен, осомничениот напаѓач е уапсен. Ова се прелиминарни информации кои се предмет на промена.

Сите училишта во оваа област се затворени, а мерките за безбедност се зголемени. Засега не се знае дали напаѓачот е ученик на ова училиште.

Силни полициски сили излегле на лице место веднаш по добиената пријава за „активен напаѓач со огнено оружје“. Испратени се пет возила на брза помош, додека најтешко повредените со хеликоптер се пренесени во блиската болница.

Учениците се евакуирани на блискиот спортски терен. Набргу, голем број родители дојдоа да ги земат своите деца.

„Ќе ни бидат потребни неколку дена да одговориме на сите прашања во врска со пукањето. Бараме трпение од јавноста. Ве молиме дозволете ни да ги утврдиме фактите“, рече Џад Смит, шериф на округот Бароу, каде што се наоѓа училиштето.