Министерот за внатрешни работи на Република Македонија Оливер Спасовски денеска се сретнал со Бејтуш Гаши, министер за внатрешни работи на Република Косово.
Досегашната соработка помеѓу двете министерства е оценета како успешна, и на политичко и на оперативно ниво. Министрите разговарале за превземање на понатамошни активности за олеснување и подобрување на протокот на патници на граничните премини помеѓу двете држави.
„Интерес на двете министерства е унапредување и продлабочување на билатералната полициска соработка со цел да се зајакне борбата против организираниот криминал и другите облици на криминално дејствување“, соопштва МВР.
Министерот Спасовски ги презентирал досегашните искуства и работа на Одделот за внатрешна контрола и професионални стандарди кои се насочени кон утврдување на непрофесионално и незаконито постапување на полициските службеници и вработените во Министерството за внатрешни работи.
Министрите се договориле во претстојниот период да се спроведат заеднички посети и средби на експертско ниво, во интерес на унапредување на постојната соработка и заедничко справување со глобалните безбедносни и сигурносни закани.
