Војната во Украина директно го постави прашањето за зависноста на европскиот континент од природниот гас од Русија. Претседателот на Комисијата за регулирање на енергијата , Жан-Франсоа Каренко, денеска ги повика сите Французи да штедат енергија уште сега, навестувајќи им го ризикот да се соочат со тензии во снабдувањето следната зима, јави дописникот на МИА.
Во интервју за дневниот весник Лес Ехо, шефот на енергетскиот регулатор смета дека тешкотиите во снабдувањето со гас предизвикани од војната во Украина и невидениот пад на производството на нуклеарна електрична енергија на ЕДФ нужно ќе доведат до тешкотии во зимата на 2022 година ако ништо не се направи.
– Мораме да заштедиме гас и електрична енергија во Франција токму сега, инаку може да тргне наопаку следната зима. Сите да вложат напори, индустријалците, терцијарниот сектор, јавните згради, но и секој од нас, без разлика дали со смалување на парното, климата, светлата. Има ургентност и сите мора да го направат тоа, порача Каренко.
Претседателот на Комисијата, исто така, повика на отстранување на административните пречки со цел да се забрза распоредувањето на пловечки терминал за ЛНГ (течен природен гас) во Ле Авр, како и поедноставување на административните и судските процедури во врска со проектите за обновлива енергија.
– Има итна потреба да се забрза. Кризата низ која поминуваме мора да овозможи да се разбере дека колективниот интерес има предност пред индивидуалниот интерес, додаде Жан-Франсоа Каренко.
Војната во Украина предизвика значително зголемување на цената на горивата и го поставува прашањето за зависноста на европскиот континент од природниот гас од Русија. Во Франција, производството на енергија е под влијание на исклучувањето на неколку нуклеарни реактори по откривањето на пукнатини од корозија на безбедносните системи. Следствено на тоа, производството на нуклеарна електрична енергија достигна ниво еквивалентно на производството од 1991 година, проценува Комисијата за регулирање на енергијата, кои беа особено ниски.
