Претседателот на Стопанската комора на Косово Берат Рукиќи вели дека, по воведувањето на таксата од 100 отсто на увозот на производи од Србија, фирми од таа држава се обидуваат да најдат начини своите производи да ги извезуваат во Косово преку Македонија, јави МИА од Приштина.
– Опасноста која јас ја гледам и на која треба да се обрне внимание е таа дека има тенденции во Македонија српските производи да се носат таму, да се пакуваат, односно да се препакуваат таму и да се реекспортираат во Косово. Тоа е алтернативниот пат на српската држава, изјави Рукиќи за телевизијата Клан Косова.
Тој вели дека во Косово нема недостаток на продукти, и покрај тоа што помина речиси еден месец од воведувањето на таксата.
Според Рукиќи, на почетокот постоеше тенденција да се создаде паника заради наводен недостаток на одредени производи, следствено и покачување на цените, но тоа не се случи.
Претседателот на Стопанската комосра на Косово вели дека „нема причини за загриженост, затоа што сите производи од Србија се заменливи“.
