САД и Русија денеска одржуваат втора рунда стратешки преговори во текот на кои ќе се обидат да надминат повеќе несогласувања, вклучително и околу нуклеарното оружје и кибер пространството, јави дописникот на МИА од Вашингтон.
Како што изјавија од Стејт департментот, американската делегација на преговорите во Женева ја предводи Венди Шерман, втор по ранг дипломат во администрацијата и заменичка државен секретар.
Првата меѓуинституционална средба се одржа во јули, но не беше постигнат некаков напредок. Таа се одржа веднаш откако Џо Бајден и Владимир Путин на самитот во јуни се договорија за рестартирање на преговорите.
Стејт департментот објави дека страните имаат за цел „да спроведат внимателно подготвен и активен дијалог насочен кон тоа да се постават основи за идните мерки по контрола на вооружувањето и намалување на ризиците“.
Други детали не се соопштуваат, а се наведува дека Шерман од Женева оди во Берн, а потоа во Узбекистан и турнејата ќе ја зарши со посети на Индија и Пакистан.
На првите преговори, руската страна изразила загриженост по повод американскиот систем на ПВО, а Американците одговориле со веќе познатиот аргумент на Вашингтон дека тие системи не се насочени кон Русија, а се поставени за запирање можни напади од Иран и Северна Кореја.
