Рускиот претседател Владимир Путин денеска пристигна во Пекинг, каде ќе се сретне со неговиот кинески колега, Си Џинпинг, во посета која ќе ја покаже длабоката меѓусебна доверба и партнерството без граници меѓу Кина и Русија.
Путин утре ќе се сретне со Си.
Тој последен пат ја посети Кина за време на Зимските олимписки игри во февруари 2022 година во Пекинг, кога Русија и Кина објавија дека нивното партнерство „нема граници“ неколку дена пред рускиот претседател да испрати десетици илјади војници во Украина.
Рускиот претседател малку патуваше во странство откако Меѓународниот кривичен суд (МКС) во Хаг издаде налог за негово апсење во март, обвинувајќи го за незаконско депортирање деца од Украина. Путин го посети Киргистан на почетокот на месецот. Наредбата на МКС обврзува 123 земји-членки да го уапсат Путин и да го префрлат во Хаг на судење доколку влезе на нивна територија. Ниту Киргистан ниту Кина не се членки на Трибуналот за воени злосторства.
Си последен пат се сретна со својот „драг пријател“ во Москва само неколку дена по издавањето на наредбата. Потоа Си го покани Путин на форумот „Појас и пат“, меѓународен форум со кој претседава кинескиот лидер.
