Шефовите на држави и влади за прв пат нема да отпатуваат во Брисел за редовен Европски Совет, соопштија претседателот Шарл Мишел.
Како што јавува дописничката на МИА од Брисел, одлучено е самитот на 26 и 27 март да се одржи виртуелно, во вид на видеоконференција поради кризата со коронавирусот.
Откако се засили пандемијата на европскиот континент повеќето министерски средби во ЕУ се одржаа преку видео конференција исто така.
Освен здравствената криза и буџетските прашања, една од главните теми на овој самит ќе биде отворањето на преговори со Македонија и Албанија. Последните нацрт-заклучоци на амбасадорско ниво укажуваат на тоа дека и двете земји ќе добијат зелено светло.
Согласност даде и Холандија неодамна за Албанија, со што се деблокира прашањето на европско ниво. Но, се очекува Македонија да добие меѓувладина конференција пред Албанија, со што де факто би се нагласила разликата во подготвеноста на двете земји.
Вчера, како што објавивме, на ист начин заседаваше и шпанскиот Сенат кој го ратификува Протоколот за Македонија во НАТО.
