Пописот е најважна државничка работа, но и граѓанска обврска и затоа е важно секој граѓанин да си ја исполни обврската и да учествува на пописот, истакнува во денешното сооопштение владејачкиот СДСМ.
Партијата која е на власт инсистира одржување на пописот во време кога во Македонија коси коронавирусот, власта нема обезбедно вакцини, а пописот го одложија речиси сите земји во кои беше планиран за годинава, дури и држави кои имаат респектабилни бројки на извршена имунизација на населението од Ковид-19.
Во продолжение го пренесуваме целото соопштение од СДСМ:
Во РС Македонија по речиси 19 години се спроведува најмасовната и најсложена операција согласно сите стандарди на Евростат и Обединетите нации.
Државата конечно ќе добие релевантни и сеопфатни податоци кои ќе го олеснат креирањето на корисни политики за економски, социјален и образовен развој на државата.
Пописот е најважна државничка работа, но и граѓанска обврска и затоа е важно секој граѓанин да си ја исполни обврската и да учествува на пописот.
Со учество на пописот секој поединец дава свој придонес кон градење држава која се темели на точно утврдени податоци, а не претпоставки.
Истовремено, непречено тече пописот на нерезиндентното население, односно на нашите иселеници во дијаспората. Според досегашните податоци, над 137.000 наши државјани во странство се самопопишале преку веб апликацијата, а процесот ќе трае до 21 април.
Ги повикуваме сите граѓани од дијаспората да се приклучат на овој патриотски чин и да помогнат да добиеме јасна слика за нашите луѓе од сите краеви на светот.
Од друга страна, повиците за бојкот и одлагање на пописот кои доаѓаат од ВМРО-ДПМНЕ и Левица се незаконски и антидржавни. Тоа се штетни ставови кои создаваат конфузија меѓу граѓаните и носат штета за државата.
Бојкотот на пописот е кривично дело.
Крајно време е политичките партии ВМРО-ДПМНЕ и Левица да престанат да работат на штета на државата.
СДСМ – Центар за комуникации со јавноста
