Кинескиот претседател Си Џинпинг денеска во Пекинг се сретна со шефот на руската дипломатија, Сергеј Лавров, на која посочи дека годинава се одбележуваат 75 години од воспоставувањето дипломатски односи меѓу Кина и Русија и дека двете земји ги здружија силите за да најдат нов пат на хармоничен соживот и соработка меѓу големите земји. Тоа, смета Си, донесе придобивки за двете земји и нивните народи и им даде мудрост и сила на меѓународната правичност и правда, пренесе „Чајна Медија Груп“ (CMG).
-Претседателот Путин и јас се договоривме да продолжиме да одржуваме блиски контакти за да се осигураме дека односите меѓу Кина и Русија секогаш се развиваат непречено и стабилно. Двете страни треба да ја искористат можноста да ја прослават 75-годишнината од воспоставувањето на дипломатските односи и да ја одржат годината на културата Кина-Русија со цел целосно да се спроведат голем број важни договори постигнати од претседателот Путин и мене, рече претседателот Си.
Кинескиот претседател нагласи дека Кина го поддржува рускиот народ да оди по развоен пат што одговара на нивните национални услови и ја поддржува Русија во борбата против тероризмот и одржувањето на социјалната сигурност и стабилност.
Тој додаде дека Кина секогаш придавала големо значење на развојот на кинеско-руските односи и е подготвена да работи со Русија за интензивирање на билатералната комуникација, зајакнување на мултилатералната стратешка соработка во мултилатерални рамки како што се БРИКС и Шангајската организација за соработка, но и за обединување на земјите на глобалниот југ во духот на еднаквост, отвореност, транспарентност и инклузивност и да се унапредат реформите на системот на глобално управување.
Лавров кажа дека под силното водство на претседателот Си Џинпинг, Кина постигна извонредни достигнувања и обезбеди важни можности за другите земји да постигнат заеднички развој.
Лавров додаде дека приоритет на руската надворешна политика е сеопфатна консолидација и подобрување на односите со Кина.
-Успешниот реизбор на претседателот Путин обезбеди континуитет на руско-кинеските односи. Односите меѓу Русија и Кина се засноваат на еднаквост и взаемна корист и ги надминаа односите со Алијансата за време на Студената војна и покажаа силна издржливост, рече рускиот министер за надворешни работи, пренесе ЦМГ.
фото:ЕПА
