СИМУЛАЦИСКА ВЕЖБА – ЗЕМЈОТРЕС: Во Скопје денеска од 9 до 14 часот затворени за сообраќај неколку булевари околу Градскиот парк

Министерството за внатрешни работи информира јавноста дека поради симулациска вежба во итна ситуација – земјотрес, насловена „Хуманитарен одговор 2023“, која во организација на Црвен крст на РСМ и под покровителство на Претседателот на државата ќе се одржи во Градски парк Скопје денеска од 9 до 14 часот ќе бидат затворени за сообраќај неколку булевари.

За сообраќај ќе бидат затворени бул.„Илинден“ од крстосница со бул. „Св. Климент Охридски“ до крстосница со ул.„Франклин Рузвелт“ и од крстосница со ул.„Бледски договор“ до крстосница со ул.„Никола Тесла“, ул.„Наум Наумовски Борче“, во продолжение ул.„Јордан Хаџиконстантинов-Џинот“ до крстосница со ул.„Ленинова“ (ул.„Аминта Трети)“, ул.„Ристо Шишков“ од крстосница со ул.„Наум Наумовски Борче“ до крстосница со ул.„Ленинова“, сообраќајниците околу Градски стадион „Тодор Проески“ и бул.„8 Септември“ од крстосница со бул.„Илинден“ до сервисна улица за влез во хотел „Александар палас“.

– Од тие причини, Единицата за безбедност на патниот сообраќај ќе преземе мерки за посебен режим на сообраќај, при што сообраќајот ќе се пренасочува по околните сообраќајници. МВР апелира до граѓаните да ги почитуваат наредбите што ги издаваат полициските службеници, информираат од МВР.

Црвениот крст денеска во Градски парк во Скопје ќе реализира симулациска вежба по прва помош во итна ситуација–земјотрес. Вежбата за управување со последици е насловена „Хуманитарен одговор 2023”, а се организира под покровителство на претседателот Стево Пендаровски, како резултат на одбележување на 60 години од катастрофалниот земјотрес во Скопје, како и зачестените катастрофи во земјата и регионот.

Главната цел на вежбата е да се претстават капацитетите, можностите и подготвеноста на Црвениот крст во координираниот пристап за одговор при кризни состојби.

На вежбата се очекува учество на повеќе од 500 лица, два хеликоптера и 40 возила. Ќе учествуваат институции вклучени во Системот за управување со кризи и домашни и странски тимови од Црвениот крст.

Поради изведувањето на вежбата, улиците кон и во Градски парк ќе бидат затворени од 9:00 до 14:00 часот, како и паркингот пред хотелот „City Park“.