Во Охрид денеска е најавено дека ќе биде отворен културниот клуб „Цар Борис Трети“. Клубот, според најавите, треба да биде отворен во 12 часот.

Отворањето на клубот предизвика реакции во јавноста, а за денеска политичката партија Левица најави протест со почетокт во 11.30 часот.

И лидерот на најголемата опозициска партија Христијан Мицкоски вчера повика „масовно да се излезе на протест“, но тој да биде мирен, демократски и без инциденти за, како што рече, „да не им се даде алиби на тие коишто се причината денес Македонија да биде во оваа ситуација“.

– Протестот е демократско право и треба да се протестира, но повикувам тој да биде мирен за да не дозволиме повторно да печалат на ваквите настани оние кои ја втурнаа Македонија во оваа ситуација, тоа е коалицијата СДСМ и ДУИ. Повикувам масовно граѓаните да излезат и да го поддржат протестот, но истовремено апелирам тој протест да биде мирен и демократски и да не дозволиме каков било инцидент да ја дефокусира јавноста од реалните проблеми, а тоа се инфлацијата, криминалот, корупцијата, енергетската, финансиската криза и уште многу други проблеми со кои Македонија денес се соочува, изјави Мицкоски.

Пратеничката од редовите на ВМРО-ДПМНЕ, Рашела Мизрахи вчера на Фејсбук објави дека нивната пратеничка група денеска до Собранието ќе поднесе Предлог-закон за изменување на Законот за здруженија и фондации.

Реакции денеска има и од Социјалистичката партија на Македонија, според која, отворањето на бугарскиот клуб „Цар Борис Трети“ во Охрид е „продолжување на омаловажувањето и понижувањето на македонскиот народ и на граѓаните со согласност и дозвола на власта“.

Пред три дена се конституираше советодавното тело што треба да дава мислење околу карактерот на историските личности кои треба да бидат составен дел од името на некое здружение или фондација, со цел да се избегне злоупотреба на одредени личности кои имаат негативен контекст низ различни епохи.

Претходно, министерот за правда Никола Тупанчевски на прашањето дали ќе се дозволи да се отвори клубот во Охрид без став од советодавното тело, рече дека најавите се такви, но како Министерство немаат никакви ингеренции, бидејќи тоа е владина комисија.