Следната 2024 година е рокот во којшто треба да бидат заменети личните документи, бидејќи дадовме рок при примената на Уставот на РСМ и Законот за јазиците, изјави денеска министерот за внатрешни работи Оливер Спасовски.

– Во однос на цените, ние објаснивме дека за 90 проценти се зголемени цените на репроматеријалите и затоа направивме зголемување кое што не е големо, имајќи предвид дека утврдивме два вида на цени. Оние кои ги менуваат пасошите на пет години, значи до 27 години, имаат иста цена на услуги, додека за остатокот имајќи предвид дека е 10 години важечкиот документ, цената е зголемена незначително за да можеме практично да ги остваруваме тие функции, одговори министерот на новинарско прашање до кога треба да се сменат документите и зошто е поскапена услугата.

Министерот за информатичко општество и администрација Азир Алиу и министерот Спасовски денеска го промовираа е-државјанство.

– Започнуваме со процесот на дигиталната трансформација на услугите за граѓаните во однос на издавање на уверение за државјанство на РСМ во електронска форма. Притоа, граѓаните на РСМ можат да добијат уверение за државјанство во електронска форма на е-маил адреса и мобилен телефон. За таа цел, како МВР донесовме Правилник за изменување и дополнување на Правилникот за начинот на водење евиденција за државјаните на РСМ и за обрасците што се применуваат односно издаваат. Притоа, работни тимови од Одделот за информатика и телекомуникации и Одделот за граѓански работи во соработка со МИОА, овозможија преку Националниот портал за електронски услуги, барањето да се реализира преку е-маил адреса или паметен телефон. Барањето се поднесува во лично име и за свое малолетно дете, а услугата е достапна на веб-сајтот www.uslugi.gov.mk, лични документи и исправи, државјанство. Барање може да поднесе лице кое има државјанство на РСМ и е регистрирано на порталот за е-услуги, преку Системот за единствена најава (СЕН), односно Националниот портал за електронски услуги, согласно прописите од областа на електронското управување и електронски услуги и од областа на електронските документи, електронската идентификација и доверливи услуги, појасни министерот.

Тој информираше дека досегашниот начин на издавање на уверение за државјанство во хартиена форма, ќе продолжи да се издава на досегашниот начин – лично или со полномошно на шалтерите во управните служби на Министерството за внатрешни работи, независно каде лицето има пријавено живеалиште.

– Како Министерство за внатрешни работи, продолжуваме со дигиталната трансформација на процесите и услуги и во наредниот период, а со цел да обезбедиме брзи услуги кон граѓаните преку намалување на влијанието на човечкиот фактор. Ова е еден важен аспект од процесот на евроинтеграциите, бидејќи така ќе се подобри и квалитетот и ефикасноста во обезбедување на услуги за граѓаните. Притоа, ќе се осигура континуитетот и непречената работа на институциите. А, воедно би споменал дека претставува една успешна алатка во борбата против корупцијата, подвлече Спасовски.

Министерот за информатичко општество и администрација Азир Алиу рече дека тука се за да објават дигитални услуги во коишто МИОА, врз основа на програмата и Националната стратегија за дигитална трансформација на државата, почнува да ги промовира дигиталните услуги што ги имаат развиено заедно со министерства и други институции, каде нудат сервиси за граѓаните.

Како што посочи тој, тие сметаат дека преку дигитализација ќе ги подобрат услугите кон граѓаните, што ќе бидат во реално време и исто така, ќе го намалат влијанието на администрацијата.

– Ние како МИОА веруваме дека преку процесот на дигитализација, исто така, ќе овозможиме нашите граѓани во реално време да дојдат до сервиси коишто им се потребни. Целта на МИОА е до крајот на 2023 година да дигитализира над 150 дигитални услуги коишто ќе бидат услуги достапни преку националниот портал uslugi.gov.mk. Исто така, сакам да ве информирам дека преку Агенцијата за дигитализација која што ќе биде амбрела на ниво на државата за процесите на дигитална трансформација овие услуги ќе може и понатаму да бидат потполно дигитализирани во коишто факторот човек ќе биде занемарен, додаде Алиу.