Жоел Гериау (66), централно-десничарски политичар од партијата Независни, е уапсен оваа недела во неговиот дом во Париз, кој беше претресен заедно со неговата канцеларија.
Француските обвинители изјавија за агенцијата Франс прес дека Гериау, сенатор на регионот Лоара-Атлантик, е под истрага затоа што „некому, против неговото знаење, му дал супстанца што може да ја промени неговата способност за расудување или самоконтрола со цел да изврши силување или сексуален напад“. Наводниот инцидент се случил во вторникот вечерта.
АФП објави дека жената која ја поднела жалбата во полиција била членка на Долниот дом на парламентот, Националното собрание, но таа не е именувана и обвинителството не дало никакви информации за неа.
На жената наводно ѝ се слошило откако пиела од чаша во домот на Гериау. Таа не била во врска со сенаторот, соопшти АФП. Обвинителите изјавиле дека медицинските тестови на жената откриле присуство на екстази. Дрогата била пронајдена при претрес на куќата на сенаторот, пренесува AFP.
Гериау, банкар, бил избран во Сенатот во 2011 година и е потпретседател на Комитетот за надворешни работи, одбрана и вооружени служби. Неговиот адвокат Реми-Пјер Драи рече: „Ние сме многу далеку од толкувањето што може да се заклучи од првите медиумски извештаи“.
Драи изрази лутина што елементи од истрагата се појавиле во француските медиуми и рече дека нема да објави „никакви информации“ за случајот „од почит“ кон неговиот клиент и жената која ја поднела жалбата.
