Киев би се согласил на средба меѓу претседателот Володимир Зеленски и рускиот лидер Владимир Путин на која било друга локација освен во Русија или Белорусија, изјави украинскиот министер за надворешни работи Андриј Сибиха. Според него, Украина е за организирање на таков состанок со цел да им се даде на преговорите „нов импулс“, пишува Европска правда.
-Се обративме до Турција и некои други престолнини… Сепак, ако кој било друг главен град, освен оние во Русија и Белорусија, организира таков состанок, ние ќе дојдеме. Тоа е важно за нас, изјави Сибиха пред новинарите.
За потсетување, Сибиха минатата недела изјави дека Зеленски е подготвен да се сретне со Путин во Турција, со учество на претседателот Реџеп Тајип Ердоган и американскиот претседател Доналд Трамп. Претходно во април, самиот Ердоган ја потврди својата подготвеност да биде домаќин на следната рунда разговори насочени кон прекин на руско-украинската војна.
Зеленски, исто така, изрази надеж дека САД би можеле да помогнат во завршувањето на војната и го повика Вашингтон да изврши притисок врз Русија, а не врз него. Во исто време, тој призна дека поради војната со Иран, вниманието на администрацијата на американскиот претседател Доналд Трамп и неговите преговарачи сега е насочено подалеку од преговорите за руско-украинската војна.
