Американскиот потпретседател, Џ.Д. Венс, денеска изјави дека Вашингтон не смее да ја подредува својата надворешна политика на Блискиот Исток на државата Израел, нагласувајќи дека САД мора да се грижат за своите национални интереси.
Зборувајќи на конференција организирана од подкастот „All-in“, Венс рече дека Израел е важен партнер на САД во областа на воената технологија и споделувањето разузнавачки информации, но дека Вашингтон понекогаш има ставови што се разликуваат од оние на израелската влада, објави „Тајмс оф Израел“.
Венс рече дека американскиот претседател Доналд Трамп, повеќе од кој било друг американски претседател во последните 40 години, покажал подготвеност да се раздели со израелскиот премиер Бенјамин Нетанјаху кога тој проценува дека интересите на американскиот народ се различни од интересите на израелската влада.
„Доналд Трамп е единствениот претседател во последните 40 години кој бил спремен да каже: „Нетанјаху е добар партнер, но тој и јас имаме различно мислење за ова прашање“ или „Нетанјаху греши за ова““, рече Венс.
Тој додаде дека Трамп можеби верува дека Нетанјаху е во право од перспектива на Израел, но дека интересите на американскиот народ бараат поинаков тек на дејствување.
Венс рече дека засновањето на односите со Израел, како и сите други односи, врз интересите на САД е најдобриот начин за водење рационален дијалог и додаде дека истиот принцип важи и за односите со НАТО.
„Имаме многу важни односи и партнерства во НАТО, но тоа не значи дека целосно ќе ја потчиниме нашата европска надворешна политика на НАТО, на ист начин како што не можеме да дозволиме нашата блискоисточна надворешна политика да биде подредена на државата Израел“, рече Венс.
Тој изјави дека САД ќе соработуваат со оние со кои можат.
„Нема да се согласуваме кога не се согласуваме и ќе ги претставуваме интересите на Америка. Тоа е единствениот начин да се има рационална надворешна политика“, заклучи американскиот потпретседател.
