Претседателот на Собранието на Косово и лидер на Демократската партија на Косово (ПДК) Кадри Весели, по повод 18-годишнината од потпишувањето на Охридскиот рамковен договор, порача дека „овој настан претставува најголемо достигнување во напорите на Албанците за да живеат како рамноправни на своите простори“ во С. Македонија, јави МИА од Приштина.

Весели преку објава на Фејсбук оцени дека Охридскиот договор е „доказ оти албанската нација е мирољубива и проблемите претпочита да ги решава по пат на дијалог и разбирање“

– Осумнаесет години од потпишувањето на Охридскиот договор во С. Македонија. Овој настан претставува најголемо достигнување во напорите на Албанците за да живеат како рамноправни на своите простори во рамките на таа држава. Оваа спогодба е доказ дека албанската нација е мирољубива и проблемите претпочита да ги решава по пат на дијалог и разбирање, напиша Весели.

Спикерот на косовскиот Парламент порача дека „мирот во С. Македонија е од животно значење и за Косово“.

– Заедно со Договорот за името, таа (спогодба) ја демократизира С. Македонија и го стабилизира Балканот. Мирот во С. Македонија е од животно значење и за Косово, затоа ние сме горди што нашите сонародници беа конструктивни и одиграа решавачка улога за евроатлантскиот пат на таа држава, напиша Весели.