Денеска се навршува една година од референдумот „За Европска Македонија“ на кој излегоа над 660.000 граѓани, а близу 610.000 гласаа „за“, истакна на денешната прес-конференција портпаролот и пратеник на СДСМ, Костадин Костадинов.
– Ниту една политичка опција, ниту една политичка програма досега не добила толку масовна и јасно изразена поддршка. Пред една година, граѓаните јасно и недвосмислено порачаа дека се за ЕУ и НАТО, за напредок, сигурна иднина, преку прифаќање на Договорот од Преспа. Со својот мнозински глас, граѓаните упатија силна порака: сакаме иднина во НАТО и во Европската Унија. Пред една година, единствени против европската иднина, против ЕУ и НАТО беа Христијан Мицкоски и ВМРО-ДПМНЕ. Тие свесно избраа да не бидат дел од историската шанса. До денеска, една година подоцна, Христијан Мицкоски и ВМРО-ДПМНЕ се уште работат против интересите на граѓаните и против ЕУ и НАТО. Единстено бранат криминал на поранешниот режим, заглавени во минатото на нивниот почесен и вистински претседдател, Никола Груевски, рече Костадинов.
Тој нагласи дека „кочењето на реформите и напредокот не даде резултат“.
– Една година подоцна нашата држава е светол пример во регионот и партнер на демократскиот свет. Членството во НАТО е извесно, Република Северна Македонија 30 земја членка на Алијансата. По спроведените реформи, со право очекуваме датум и почеток на преговорите со Европската Унија. Како одговорна партија, носител на промените, продолжуваме да работиме во интерес на граѓаните, државата и нивната иднина, рече Костадинов.
