Владата денеска ќе ја одржи редовната 117-та седница, која е прва по оставката на премиерот Зоран Заев, а на дневен ред се повеќе точки од нејзината програма за работа.
Владата денеска ќе ја разгледа и ќе ја стави на усвојување и Националната стратегија за вработување 2021-2027 година со вклучен Акциски план за вработување.
На дневниот ред на оваа седница, меѓу другото, е Информацијата за напредок во имплементацијата на Вториот проект за подобрување на општинските услуги заклучно со септември 2021 година.
На предлог на Министерството за надворешни работи, денеска пред министрите ќе се најде и Предлог-законот за ратификација на договорите меѓу Владата на Македонија и Владата на Албанија за воспоставување на заеднички гранични премини, како и Предлог-законот за ратификација на Меморандумот за разбирање за олеснување на патниот транспорт на стоки во регионот на Организацијата за црноморска економска соработка.
За донесените одлуки и заклучоци од Владината седница, со почеток во 12, јавноста ќе биде известена преку соопштение веднаш штом ќе биде завршена.
Не е соопштено кој ќе преседава на седницата, дали премиерот во оставка Заев или некој од вицепремиерите.
