Бројот на новозаразени од коронавирусот и натаму расте, апетитот на власта за неодложно држување на пописот не се смалува, а фрижидерите за вакцини на премиерот Зоран Заев и министерот за здравство Венко Филипче и натаму се празни без ниту една вакцина, но полни со „протоколи за безбедност“.

Досега имаше ветувања, уште од минатата година, дека вакцините ќе пристигнат до „крајот на овој месец“, а сега веќе нема ни ветувања, откако пропаднаа сите што ги слушаме од почетокот на годинава. Но, за власта пописот и натаму е поважен од здравјето на граѓаните.

Пописот е статистичка операција во интерес на сите граѓани и не се прави ниту за Владата, ниту за некоја политичка партија, а Државниот завод за статистика гарантира за безбедноста на процесот и за почитувањето мерките содржани во Протоколот, со што никој нема да биде доведен во опасност.

Со оваа порака вчера излезе првиот човек на ДЗС, Апостол Симовски во интервју за 360 степени, изразувајќи надеж дека по 20 години без попис во државата ќе има доволно разум кај нашите граѓани, да сфатат дека ни е неопходна оваа акција.

Теренското попишување почнува на 1 април, а поради зголемување на бројот на новозаразени со Ковид-19 се отвори и прашањето за начинот на кој ќе се спроведе операцијата и дали мерките содржани во Протоколот се доволна гаранција. Власта останува на ставот дека пописот ќе биде безбеден, дека мерките и нивно максимално почитување се доволни, додека лидерот на ВМРО-ДПМНЕ, Христијан Мицкоски вчера уште еднаш побара итно одложување на пописот, поради зголемувањето на бројот на нови случаи на Ковид-19.

Симовски вчера осврнувајќи се на прашањето како ќе ги убедат граѓаните дека пописот е безбеден во период кога расте бројот на заразени, рече дека тие гарантираат за процесот на попишување и дека апсолутно ќе се почитуваат сите протоколи и нема да доведат никого во опасност, но дека не може да гарантираат за неодговорно однесување на поединци после заминување на попишувачот.

-Комисијата за заразни болести многу внимателно ги разгледала сите можни ситуации и донела навистина ригорозни препораки. Тие препораки се преточени во одлука на Владата и наша обврска е да ги почитуваме. Но, и граѓаните треба да ги почитуваат тие протоколи, бидејќи не вреди ништо ако попишувачот дојде маскиран целиот, не знам, со комбинезони на себе, со маска, ракавици, ако граѓанинот се шета без маска. Или, не можеме да гарантираме за неодговорно однесување на поединци после заминување на попишувачот ако отидат во кафеана и си седнат со друштво итн, изјави Симовски.

Нагласи дека негативната кампања за пописот всушност ја прават луѓе кои очигледно не ѝ сакаат добро на сопствената држава и на сопствените граѓани.

– Не е проблемот дали некој ќе биде казнет или не, многу е лесно да казните поединец, ако не сака да даде податоци, и тоа ќе го направиме, да се разбереме, нема да простиме. Меѓутоа, целта не е да собереме казни туку да собереме податоци. Ние влегуваме во оваа операција којашто се подготвува поприлично долго време, којашто чини страшно многу пари, којашто ангажира страшно многу луѓе, и да биде залудна, навистина ќе биде страшно, вели Симовски.

Владата со став дека пописот се спроведува и ќе се спроведе целосно безбедно, по сите стандарди без застој, а протоколи и досега давале целосна заштита во други процеси. Владиниот портпарол Душко Арсовски завчера истакна дека прават се што е потребно за заштита на населението.

-Имаме прецизни протоколи, скроени за безбедно спроведување. Подготвени сме за секој детал, за секоја ситуација и сите постапки течат непречено. Протоколот го изработи Комисијата за заразни болести. Стандардите за заштита се највисоки и во целост ги штитат граѓаните и попишувачите, нагласи тој и информира дека се ангажирани голем број координатори и попишувачи, кои ги следат протоколите за да нема потреба од никакви одложувања.

Министерот за правда Бојан Маричиќ вчера во Брисел одржа брифинг со  Центарот за европска политика (ЕПЦ)  на кој говореше и за претстојниот попис и за неговото огромно значење за државата. Тој информира дека првата фаза од попишувањето заврши успешно и оти за неколку денови, односно од 1 април ќе почне и успешно ќе се спроведе главната фаза на статистичката операција. -Северна Македонија немала попис веќе 20 години, а таа состојба повеќе е неиздржлива, истакна Маричиќ и посочи дека државата ќе го заврши пописот, соопшти Министерството за правда

Од владејачката СДСМ на став дека пописот ќе се спроведе согласно сите здравствени протоколи. Пратеникот и портпарол на СДСМ, Костадин Костадинов вчера на прес-конференција од Собранието посочи дека државата има капацитет и е гарант дека во најголемата статистичка операција, целосно ќе биде заштитено здравјето како на граѓаните, таа и на попишувачите.

-Попишувачите коишто ќе бидат на терен и во непосреден контакт максимално ќе ги почитуваат мерките и протоколите за заштита на здравјето. Овде државата е гарант дека од страна на попишувачите на ниту еден начин нема да биде загрозено здравјето на граѓаните. Од друга страна речиси 20 години сме без одржан попис и сметам дека навистина е голема неопходноста за одржување на една таква статистичка операција и како таква граѓаните ја разбираат и како таква ќе биде реализирана, имплементирана во државата, заклучи Костадинов.

Претходно лидерот на ВМРО-ДПМНЕ, Христијан Мицкоски уште еднаш побара одложување на пописот веднаш, посочувајќи дека здравјето на граѓаните не смее да биде заложник.

-Најкриминалната влада на Балканот, а истовремено и најнеспособната да обезбеди имунизација на населението нѐ убедува дека нема одложување на пописот, обезбедени биле најбезбедни протоколи. А во меѓувреме, соседна Србија која е рекордер во имунизирано население на Балканот, соседна Бугарија, Романија, Косово го одложуваат пописот поради загриженост од енормно ширење на пандемијата, напиша Мицковски на Фејсбук.

Според последните податоци на ДЗС заклучно до вчера до 8 часот, вкупниот број на самопопишани државјани на Република Северна Македонија изнесува 130 009.

-Интересот на нашите државјани во странство за искористување на можноста да ги дадат своите податоци во процесот на попишување на дијаспората секојдневно расте. Оваа активност има извонредно значење и за Република Северна Македонија и за целата дијаспора – после многу години и секакви шпекулации со бројките на иселени државјани, конечно да имаме јасна слика каде се и колку се нашите иселеници за да може да се креираат и насочат соодветни политики за нивна поддршка и овозможување услуги кои им се потребни од својата татковина, наведе вчера ДЗС.