Секој ден е нов пик, вчерашната бројка од 641 заболени е вина на Комисијата, која треба да се замени со нова Специјална комисијата од експерти, реагира денеска опозициската ВМРО-ДПМНЕ.
– Власта и Комисијата за заштита од заразни болести немаат никаков кредибилитет и не можат да се справат со корона кризата. Секој четврти тестиран во Македонија е болен од КОВИД. Вчерашната бројка од 641 новозаболени е доказ дека ништо од тоа што власта направи нема ефект. Секој ден е нов пик. Комисијата за заштита од заразни болести потфрли и од првично најавуваните 2.000 заболени за цела пандемија, сега имаме 2.000 за само една недела. Власта предлага несуштински мерки за борба против пандемијата, уште од самиот старт во март пристапот е погрешен и политикантски, се вели во реакцијата.
Натаму во соопштението се додава:
– Комисијата за заштита од заразни болести е главниот виновник за високиот број на заразени и починати. Комисијата наместо стручност демострираше политика. Токму затоа е потребно формирање на Специјална комисија која ќе биде составена од професионалци, експерти во своите области кои здравјето и интересот на граѓаните ќе ги стават пред лично партиските интереси на партијата на власт. СДСМ нема капацитет да биде во функција на граѓаните и овој пат одлучи да партизира се до крај. Потребен е систематски пристап кој ќе резултира за подобрена општа здравствена состојба и силна економија, соопшува ВМРО-ДПМНЕ.
