Зоран Заев не смее да бега од избори, а одложувањето на изборите само ќе не втурне во политичка криза и економска апатија, се вели во денешната реакција од ВМРО-ДПМНЕ во врска со изјавите за можно одложување на изборите што се закажани за 12 април.
– Македонија тоне на секое поле. Транспаренси Интернешнл ја прогласи Македонија под водство на Заев за најкорумпирана земја во Европа. Поради партизацијата и криминалот на Заеви угледното списание „Економист“ Република Македонија ја оцени како хибриден режим, што претставува исклучително поразителна оценка за владеењето на правото и правната држава. Со СДСМ на власт над 500.000 граѓани живеат на работ на сиромаштијата додека секој трет во државата има проблем да обезбеди основна егзистенција, се вели во реакцијата.
Натаму во соопштението се додава:
– Со Зоран Заев на чело на државата Македонија е земја со трета по ред највисока младинска невработеност во светот. Со Заев и СДСМ Македонија само тоне. Потребни се промени. Потребна е обнова. Токму затоа ВМРО-ДПМНЕ ќе поднесе иницијатива за распуштање на Собранието. Избори на 12, за брзо надминување на проблемите и последиците од штетното владеење на СДСМ, се вели во соопштението од ВМРО-ДПМНЕ.
